ന്യൂഡൽഹി: പ്രധാനമന്ത്രി നരേന്ദ്ര മോദിയുടെ നാല് ദിവസത്തെ ഉസ്ബെക്കിസ്ഥാൻ–കിർഗിസ്ഥാൻ സന്ദർശനം ഓഗസ്റ്റ് 29ന് ആരംഭിക്കും. ഇരു രാജ്യങ്ങളുമായുള്ള ഉഭയകക്ഷി ബന്ധം കൂടുതൽ ശക്തിപ്പെടുത്തുന്നതിനും കിർഗിസ്ഥാന്റെ തലസ്ഥാനമായ ബിഷ്കെക്കിൽ നടക്കുന്ന 26-ാമത് ഷാങ്ഹായ് സഹകരണ സംഘടന (എസ്സിഒ) ഉച്ചകോടിയിൽ പങ്കെടുക്കുന്നതിനുമാണ് സന്ദർശനം.
ഓഗസ്റ്റ് 29, 30 തീയതികളിൽ പ്രധാനമന്ത്രി ഉസ്ബെക്കിസ്ഥാൻ സന്ദർശിക്കും. പ്രസിഡന്റ് ഷാവ്കത്ത് മിർസിയോയേവിന്റെ ക്ഷണപ്രകാരമാണ് താഷ്കെന്റിലെത്തുന്നത്. പ്രധാനമന്ത്രിയുടെ ഉസ്ബെക്കിസ്ഥാനിലേക്കുള്ള നാലാമത്തെ സന്ദർശനമാണിത്.
സന്ദർശനത്തിനിടെ പ്രസിഡന്റ് മിർസിയോയേവുമായി പ്രധാനമന്ത്രി പ്രതിനിധിതല ചർച്ചകൾ നടത്തും. ഇരു രാജ്യങ്ങളും തമ്മിലുള്ള തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്തുന്നതിനുള്ള വഴികളാകും ചർച്ചകളിൽ പ്രധാനമായും പരിഗണിക്കുക.
വ്യാപാരം, നിക്ഷേപം, പ്രതിരോധം, ഡിജിറ്റൽ കണക്റ്റിവിറ്റി, ഊർജം, വിദ്യാഭ്യാസം, ജനങ്ങൾ തമ്മിലുള്ള ബന്ധം തുടങ്ങിയ മേഖലകളിലെ സഹകരണം ഇരു നേതാക്കളും അവലോകനം ചെയ്യും. ഭാവിയിലേക്കുള്ള സഹകരണ അജണ്ടയ്ക്കും രൂപം നൽകും.
‘വികസിത് ഭാരത് 2047’, ‘ഉസ്ബെക്കിസ്ഥാൻ-2030’ എന്നീ വികസന ദർശനങ്ങൾ തമ്മിലുള്ള സഹകരണം മുന്നോട്ടുകൊണ്ടുപോകുന്നതിനെക്കുറിച്ചും ഇരു നേതാക്കളും ആശയവിനിമയം നടത്തും.
താഷ്കെന്റിൽ പ്രധാനമന്ത്രി മോദി ശാസ്ത്രി സ്മാരകവും താഷ്കെന്റ് സ്റ്റേറ്റ് യൂണിവേഴ്സിറ്റി ഓഫ് ഓറിയന്റൽ സ്റ്റഡീസിലെ മഹാത്മാഗാന്ധി സെന്ററും സന്ദർശിക്കുമെന്നും പ്രതീക്ഷിക്കുന്നു.
ഉസ്ബെക്കിസ്ഥാൻ സന്ദർശനത്തിന് ശേഷം ഓഗസ്റ്റ് 31 മുതൽ സെപ്റ്റംബർ 1 വരെ പ്രധാനമന്ത്രി മോദി കിർഗിസ് റിപ്പബ്ലിക്കിന്റെ തലസ്ഥാനമായ ബിഷ്കെക്കിലെത്തും. ഇവിടെ നടക്കുന്ന 26-ാമത് എസ്സിഒ ഉച്ചകോടിയിൽ അദ്ദേഹം പങ്കെടുക്കും.
ഓഗസ്റ്റ് 31ന് നേതാക്കൾക്കായുള്ള അത്താഴവും സെപ്റ്റംബർ ഒന്നിന് ഉച്ചകോടി പ്ലീനറിയും നടക്കും. പ്ലീനറി സമ്മേളനത്തിൽ പ്രധാനമന്ത്രി മോദി പ്രസംഗിക്കും.
എസ്സിഒ ഉച്ചകോടിക്കിടെ അംഗരാജ്യങ്ങളിലെ നേതാക്കളുമായി പ്രധാനമന്ത്രി നിരവധി ഉഭയകക്ഷി കൂടിക്കാഴ്ചകളും നടത്തും. മാറിക്കൊണ്ടിരിക്കുന്ന ആഗോള സുരക്ഷാ സാഹചര്യവും ഭീകരവാദം ഉൾപ്പെടെയുള്ള വെല്ലുവിളികളും ഉച്ചകോടിയിൽ പ്രധാന ചർച്ചയാകുമെന്നാണ് പ്രതീക്ഷിക്കുന്നത്.
എസ്സിഒയുടെ 25-ാം വാർഷിക വർഷമാണ് 2026. ‘എസ്സിഒയുടെ 25 വർഷങ്ങൾ: സുസ്ഥിര സമാധാനം, വികസനം, സമൃദ്ധി എന്നിവയിലേക്ക് ഒരുമിച്ച്’ എന്നതാണ് ഇത്തവണത്തെ ഉച്ചകോടിയുടെ പ്രമേയം.
നിലവിൽ 10 അംഗരാജ്യങ്ങളും 15 സംഭാഷണ പങ്കാളികളും ഉൾപ്പെടുന്ന സംഘടനയിൽ നിരീക്ഷക രാജ്യങ്ങളുമുണ്ട്. ഭീകരവാദം, വിഘടനവാദം, തീവ്രവാദം എന്നീ മൂന്ന് പ്രധാന വെല്ലുവിളികളെ നേരിടുക എന്ന ലക്ഷ്യത്തോടെയാണ് എസ്സിഒ രൂപീകരിച്ചത്. ഈ വിഷയങ്ങൾ ഇപ്പോഴും സംഘടനയുടെ പ്രധാന പരിഗണനകളിലൊന്നാണെന്ന് വിദേശകാര്യ മന്ത്രാലയം വ്യക്തമാക്കി.
ബിഷ്കെക്കിൽ നടക്കുന്ന ആറാമത് ലോക നോമാഡ് ഗെയിംസിന്റെ ഉദ്ഘാടന ചടങ്ങിലും പ്രധാനമന്ത്രി മോദി എസ്സിഒ അംഗരാജ്യങ്ങളിലെ മറ്റ് നേതാക്കൾക്കൊപ്പം പങ്കെടുക്കുമെന്ന് പ്രതീക്ഷിക്കുന്നു.
ഇന്ത്യയും മധ്യേഷ്യൻ രാജ്യങ്ങളും തമ്മിലുള്ള തന്ത്രപ്രധാന ബന്ധം കൂടുതൽ ശക്തിപ്പെടുത്തുന്നതിനുള്ള അവസരമായാണ് പ്രധാനമന്ത്രിയുടെ സന്ദർശനത്തെ വിദേശകാര്യ മന്ത്രാലയം കാണുന്നത്. വ്യാപാരവും പ്രതിരോധവും മുതൽ ഊർജവും ഡിജിറ്റൽ മേഖലയും വരെയുള്ള സഹകരണം വിപുലീകരിക്കുന്നതിനൊപ്പം മേഖലയുടെ സുരക്ഷാ സാഹചര്യത്തിലും ഇന്ത്യയുടെ നിലപാട് ശക്തമായി അവതരിപ്പിക്കുന്നതായിരിക്കും മോദിയുടെ നാല് ദിവസത്തെ സന്ദർശനം.
