ഹിന്ദു ഉണർന്നാൽ വിശ്വം ഉണരും; വളർച്ചയുടെ അളവുകോൽ അധികാരമല്ല, സേവനം: ഡോ. മോഹൻ ഭാഗവത്

ടൊറന്റോ: ഹിന്ദു എന്നത് പ്രത്യേക ഭാഷയിലോ ആരാധനാരീതിയിലോ ജീവിതശൈലിയിലോ ഒതുങ്ങുന്ന ഒന്നല്ലെന്ന് ആർഎസ്എസ് സർസംഘചാലക് ഡോ. മോഹൻ ഭാഗവത്. ടൊറന്റോയിൽ നടന്ന ‘ഹിന്ദു വിശ്വബന്ധു – Embrace the World in Friendship’ സംഗമത്തിൽ സംസാരിക്കുകയായിരുന്നു അദ്ദേഹം.

ഹിന്ദു എന്ന  ചിന്തയുടെ അടിസ്ഥാനം വൈവിധ്യങ്ങളെ അംഗീകരിക്കുകയും ബഹുമാനിക്കുകയും അതിനുള്ളിലെ അടിസ്ഥാനപരമായ ഐക്യം തിരിച്ചറിയുകയുമാണെന്ന് അദ്ദേഹം കൂട്ടിച്ചേർത്തു.

‘വൈവിധ്യം സ്വാഭാവികം, ഐക്യമാണ് യാഥാർഥ്യം’
ജാതി, മതവിഭാഗം, ഭാഷ തുടങ്ങി പലതരത്തിലുള്ള വൈവിധ്യങ്ങൾ സ്വാഭാവികമാണ്. എന്നാൽ ഐക്യമാണ് അടിസ്ഥാന യാഥാർഥ്യം. ഈ യാഥാർഥ്യം മനസിലാക്കി സ്വാഭാവികമായ വൈവിധ്യങ്ങളെ സമീപിക്കണം. ഭാരതത്തിന്റെ പുരാതന പാരമ്പര്യമാണിത്. വൈവിധ്യത്തെ ഐക്യത്തിന് ഭീഷണിയായി കാണേണ്ടതില്ലെന്നും അദ്ദേഹം പറഞ്ഞു. വൈവിധ്യത്തെ അംഗീകരിക്കുകയും ബഹുമാനിക്കുകയും സംരക്ഷിക്കുകയും വേണം. അത് ഐക്യത്തിന്റെ തന്നെ പ്രകടനമാണെന്നും മോഹൻ ഭാഗവത് കൂട്ടിച്ചേർത്തു.

‘ഹിന്ദു ഉണർന്നാൽ ലോകവും ഉണരും’
ആവശ്യമുള്ളവർക്ക് സഹായഹസ്തം നീട്ടുന്നത് ഭാരതത്തിന്റെ പാരമ്പര്യമാണെന്നും അദ്ദേഹം ചൂണ്ടിക്കാട്ടി. ലോകത്തിന്റെ ഏത് ഭാഗത്തുനിന്നും സഹായം തേടിയെത്തിയാലും ഭാരതം നിരസിച്ചിട്ടില്ലെന്നും ആവശ്യപ്പെടാതിരുന്നപ്പോഴും സഹായം നൽകുന്ന പാരമ്പര്യമാണ് ഭാരതത്തിന്റേതെന്നും അദ്ദേഹം പറഞ്ഞു.

‘ഹിന്ദു ഉണർന്നാൽ ലോകം ഉണരും’ എന്ന ആശയവും അദ്ദേഹം പരാമർശിച്ചു. വൈവിധ്യത്തിൽ ഏകത്വം കാണാനും ജീവജാലങ്ങളെയും അജീവ ഘടകങ്ങളെയും സ്വന്തമായി കാണാനുമാണ് ഹിന്ദു ആത്മീയ പാരമ്പര്യം പഠിപ്പിക്കുന്നതെന്നും മോഹൻ ഭാഗവത് പറഞ്ഞു.

‘വസുധൈവ കുടുംബകം’
ലോകം മുഴുവൻ ഒരു കുടുംബമാണെന്ന ‘വസുധൈവ കുടുംബകം’ എന്ന ആശയവും മോഹൻ ഭാഗവത് ചൂണ്ടിക്കാട്ടി. മനുഷ്യർക്ക് രൂപത്തിലും ഭാഷയിലും ജീവിതരീതിയിലും വ്യത്യാസങ്ങളുണ്ടാകാം. എന്നാൽ അടിസ്ഥാനപരമായി എല്ലാവരും ഒന്നാണെന്ന തിരിച്ചറിവാണ് മറ്റുള്ളവരെ സേവിക്കാനുള്ള ഉത്തരവാദിത്വത്തിലേക്ക് നയിക്കുന്നത്.

മുസ്ലിങ്ങൾക്കും ക്രിസ്ത്യാനികൾക്കും ജൂതർക്കും പാർസികൾക്കും ഉൾപ്പെടെ പീഡനം നേരിട്ട നിരവധി വിഭാഗങ്ങൾക്ക് ഭാരതം ചരിത്രത്തിലുടനീളം അഭയം നൽകിയിട്ടുണ്ട്. നമ്മുടെ പൂർവികർ രാജ്യങ്ങൾ കീഴടക്കാനല്ല, അറിവും നാഗരികതയുടെ മൂല്യങ്ങളും പങ്കുവെക്കാനാണ് ലോകത്തിന്റെ വിവിധ ഭാഗങ്ങളിലേക്ക് യാത്ര ചെയ്തത്.

സൈനിക-സാമ്പത്തിക ശക്തിയിലൂടെ ലോകത്തെ കീഴടക്കിയല്ല ഭാരതം ‘വിശ്വഗുരു’ ആയത്. ലോകത്തിന് സേവനം ചെയ്തതിലൂടെയാണ് ഭാരതം വിശ്വഗുരുവായതെന്നും അദ്ദേഹം വ്യക്തമാക്കി.