ആലപ്പുഴ: കരുവാറ്റയിൽ വയോധികനെ കൊലപ്പെടുത്തി സ്വർണം കവർന്ന കേസിൽ അസാധാരണ നടപടി. കേസിൽ കുറ്റാരോപിതരായ മൂന്ന് ആൺകുട്ടികളെയും പൊലീസ് കസ്റ്റഡിയിൽ വിട്ട് ആലപ്പുഴ ജുവനൈൽ ജസ്റ്റിസ് ബോർഡ് ഉത്തരവിട്ടു. മൂന്ന് പേരും പ്രായപൂർത്തിയാകാത്തവരായിരിക്കെയാണ് തെളിവെടുപ്പിനും അന്വേഷണത്തിനുമായി പൊലീസ് കസ്റ്റഡിയിൽ വിട്ടത്. ജുവനൈൽ നീതിന്യായ സംവിധാനത്തിൽ തന്നെ അപൂർവമായി പരിഗണിക്കപ്പെടുന്ന നടപടിയാണ് ബോർഡിന്റെ ഭാഗത്തുനിന്നുണ്ടായത്.
ഡൽഹി നിർഭയ കേസിൽ പോലും പ്രായപൂർത്തിയാകാത്ത പ്രതിയെ പൊലീസ് കസ്റ്റഡിയിൽ വിട്ടിരുന്നില്ലെന്ന പ്രത്യേകതയും ഈ ഉത്തരവിനുണ്ട്. പ്രായപൂർത്തിയാകാത്ത കുട്ടികളെ പൊലീസ് കസ്റ്റഡിയിൽ വിടുന്നതിന് ജുവനൈൽ ജസ്റ്റിസ് നിയമത്തിൽ വ്യവസ്ഥയില്ലെന്നും ഇതുസംബന്ധിച്ച് മുൻവിധികളുമില്ലെന്നുമുള്ള വാദം ഉയർന്നിരുന്നു. എന്നാൽ ഈ വാദം തള്ളിയാണ് ആലപ്പുഴ ജുവനൈൽ ജസ്റ്റിസ് ബോർഡ് അസാധാരണ ഉത്തരവ് പുറപ്പെടുവിച്ചത്.
ജുവനൈൽ ജസ്റ്റിസ് നിയമത്തിൽ കുട്ടികളെ പൊലീസ് കസ്റ്റഡിയിൽ വിടുന്നതിന് പ്രത്യേക വ്യവസ്ഥയില്ലെങ്കിലും, തെളിവെടുപ്പിനായി വിട്ടുകിട്ടുന്നതിനുള്ള ക്രിമിനൽ നടപടി വ്യവസ്ഥകൾ പരിഗണിക്കാമെന്നായിരുന്നു പ്രോസിക്യൂഷന്റെ വാദം. കുട്ടികളെ പൊലീസ് ലോക്കപ്പിലോ ജയിലിലോ പാർപ്പിക്കരുതെന്നാണ് ജുവനൈൽ ജസ്റ്റിസ് ആക്ടിലെ വ്യവസ്ഥ. എന്നാൽ പൊലീസ് കസ്റ്റഡിയെക്കുറിച്ച് പ്രത്യേക വിലക്ക് ആക്ടിൽ ഇല്ലാത്ത സാഹചര്യത്തിൽ, ബിഎൻഎസ്എസിലെ പ്രസക്തമായ വകുപ്പ് പരിഗണിച്ച് അന്വേഷണത്തിനായി കുട്ടികളെ വിട്ടുകിട്ടണമെന്ന ആവശ്യം പ്രോസിക്യൂഷൻ ഉന്നയിച്ചു.
ദൃക്സാക്ഷികളില്ലാത്ത കേസിൽ സംഭവസ്ഥലത്തെത്തിച്ച് തെളിവെടുപ്പ് നടത്താൻ സാധിച്ചില്ലെങ്കിൽ അന്വേഷണം ദുർബലപ്പെടുമെന്ന പ്രോസിക്യൂഷൻ വാദവും ബോർഡ് അംഗീകരിച്ചു. കുറ്റകൃത്യവുമായി ബന്ധപ്പെട്ട കൂടുതൽ തെളിവുകൾ ശേഖരിക്കുന്നതിനും അന്വേഷണ നടപടികൾ പൂർത്തിയാക്കുന്നതിനും ആൺകുട്ടികളുടെ കസ്റ്റഡി അനിവാര്യമാണെന്നായിരുന്നു അന്വേഷണ സംഘത്തിന്റെ നിലപാട്. അതേസമയം, കസ്റ്റഡിയുമായി ബന്ധപ്പെട്ട വിവരങ്ങൾ അതീവ രഹസ്യമായി സൂക്ഷിക്കണമെന്നും ജുവനൈൽ ജസ്റ്റിസ് ബോർഡ് നിർദേശിച്ചിട്ടുണ്ട്.
കേസിൽ മോഷണം പോയ സ്വർണം പൊലീസ് ഇതിനകം കണ്ടെത്തിയിട്ടുണ്ട്. എന്നാൽ കൊലപാതകത്തിന് ഉപയോഗിച്ചതായി കരുതുന്ന കൈയുറകൾ ഇതുവരെ കണ്ടെത്താനായിട്ടില്ല. കൈയുറകൾ കണ്ടെത്തുന്നതിനും കേസുമായി ബന്ധപ്പെട്ട കൂടുതൽ ശാസ്ത്രീയ തെളിവുകൾ ശേഖരിക്കുന്നതിനുമാണ് മൂന്ന് ആൺകുട്ടികളെയും കസ്റ്റഡിയിൽ ലഭിക്കണമെന്ന് അന്വേഷണ സംഘം ആവശ്യപ്പെട്ടത്.
സംഭവസ്ഥലത്ത് എത്തിച്ച് തെളിവെടുപ്പ് പൂർത്തിയാക്കിയില്ലെങ്കിൽ പിന്നീട് കോടതിയിൽ കുറ്റപത്രത്തിലെ ആരോപണങ്ങൾ തെളിയിക്കുന്നതിൽ ബുദ്ധിമുട്ടുണ്ടാകുമെന്നും പ്രോസിക്യൂഷൻ വാദിച്ചു. ജുവനൈൽ ജസ്റ്റിസ് ബോർഡിന്റെ അനുമതിയോടെയാണ് ജില്ലാ പ്രൊബേഷൻ ഓഫീസറുടെ സാന്നിധ്യത്തിൽ ആൺകുട്ടികളെ ചോദ്യം ചെയ്തത്.
രണ്ട് ദിവസങ്ങളിലായി ആകെ 10.30 മണിക്കൂർ നീണ്ട ചോദ്യംചെയ്യലാണ് പൂർത്തിയാക്കിയത്. ഇതിന് പിന്നാലെയാണ് കുറ്റകൃത്യം ആസൂത്രണം ചെയ്തതായി ആരോപിക്കപ്പെടുന്ന 13കാരിയെ ചോദ്യം ചെയ്യുന്നതിനായി അന്വേഷണ സംഘം പ്രത്യേകം അപേക്ഷ നൽകിയത്. ഈ അപേക്ഷ ജുവനൈൽ ജസ്റ്റിസ് ബോർഡ് തിങ്കളാഴ്ച പരിഗണിക്കും.
ശാസ്ത്രീയ തെളിവുകളുടെയും വിവിധ മൊഴികളുടെയും അടിസ്ഥാനത്തിൽ അന്വേഷണ സംഘം തയ്യാറാക്കിയ റിപ്പോർട്ടും ബോർഡിന് കൈമാറിയിട്ടുണ്ട്. ഈ റിപ്പോർട്ടും മറ്റ് അന്വേഷണ വിവരങ്ങളും പരിശോധിച്ച ശേഷമായിരിക്കും 13കാരിയെ ചോദ്യം ചെയ്യുന്നതുമായി ബന്ധപ്പെട്ട് ബോർഡ് തീരുമാനമെടുക്കുക.
കേസിലെ മൂന്ന് ആൺകുട്ടികളെയും ചേർത്തല മായിത്തറയിലെ സംരക്ഷണകേന്ദ്രത്തിലാണ് താമസിപ്പിച്ചിരിക്കുന്നത്. 13കാരിയെ സാമൂഹികക്ഷേമ വകുപ്പിന്റെ കോഴിക്കോട്ടുള്ള കേന്ദ്രത്തിലാണ് പാർപ്പിച്ചിരിക്കുന്നത്. പ്രായപൂർത്തിയാകാത്ത പ്രതികളായതിനാൽ നിയമപരമായ നടപടിക്രമങ്ങൾ പാലിച്ചാണ് ഇവരെ സംരക്ഷണ കേന്ദ്രങ്ങളിൽ താമസിപ്പിച്ചിരിക്കുന്നത്.
പ്രോസിക്യൂഷനുവേണ്ടി അസി. പബ്ലിക് പ്രോസിക്യൂട്ടർ മനു കല്ലമ്പള്ളിയും പ്രതിഭാഗത്തിനുവേണ്ടി ചീഫ് ഡിഫൻസ് കൗൺസൽ ടി.ടി. സുധീഷും ഹാജരായി. കരുവാറ്റ കൊലപാതക കേസിലെ അന്വേഷണം നിർണായക ഘട്ടത്തിലേക്ക് കടക്കുന്നതിനിടെയാണ് പ്രായപൂർത്തിയാകാത്ത മൂന്ന് ആൺകുട്ടികളെ പൊലീസ് കസ്റ്റഡിയിൽ വിട്ടുകൊണ്ടുള്ള ജുവനൈൽ ജസ്റ്റിസ് ബോർഡിന്റെ അപൂർവ ഉത്തരവ് പുറത്തുവന്നിരിക്കുന്നത്.
