തിരുവനന്തപുരം: മതപഠനത്തിനെത്തിയ പത്തുവയസ്സുകാരായ രണ്ട് ആൺകുട്ടികൾക്ക് നേരെ ലൈംഗികാതിക്രമം നടത്തിയ കേസിൽ മദ്രസ അധ്യാപകൻ അറസ്റ്റിൽ. കൊല്ലം സ്വദേശി എൻ. ഇസ്മായിൽ (58) ആണ് വലിയതുറ പോലീസിന്റെ പിടിയിലായത്.
തിരുവനന്തപുരത്തെ വേളി മാധവപുരത്തെ മദ്രസയിലാണ് കേസിനാസ്പദമായ സംഭവം നടന്നതെന്ന് വലിയതുറ പോലീസ് അറിയിച്ചു. ഓഗസ്റ്റ് 24-നായിരുന്നു സംഭവം. മതപഠനത്തിനായി എത്തിയ കുട്ടികളോട് അധ്യാപകൻ ലൈംഗികാതിക്രമം നടത്തിയെന്നാണ് പരാതി.
വീട്ടിലെത്തിയ കുട്ടികൾ സംഭവത്തെക്കുറിച്ച് രക്ഷിതാക്കളോട് പറയുകയായിരുന്നു. തുടർന്ന് രക്ഷിതാക്കൾ വലിയതുറ പോലീസ് സ്റ്റേഷനിലെത്തി പരാതി നൽകി.കുട്ടികളുടെ മൊഴിയുടെ അടിസ്ഥാനത്തിൽ പോക്സോ നിയമത്തിലെ വകുപ്പുകൾ ഉൾപ്പെടെ ചുമത്തി പോലീസ് കേസെടുത്തു. തുടർന്ന് ഇസ്മായിലിനെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
സംഭവത്തിൽ കൂടുതൽ അന്വേഷണം തുടരുകയാണ്. പ്രതി നേരത്തെയും സമാനമായ രീതിയിൽ കുട്ടികൾക്കെതിരെ അതിക്രമം നടത്തിയിട്ടുണ്ടോയെന്നും പോലീസ് പരിശോധിക്കുന്നുണ്ട്.
