ഭീകരന് ശിക്ഷാ ഇളവ് വേണം പോലും!!! മുംബൈ സ്ഫോടനക്കേസ് പ്രതി അബു സലീമിനെ വിട്ടയക്കില്ല; മോചന ഹർജി തള്ളി സുപ്രീം കോടതി

ന്യൂഡൽഹി: 1993ലെ മുംബൈ സ്ഫോടന പരമ്പര കേസ് പ്രതിയും അധോലോക കുറ്റവാളിയുമായ അബു സലീമിന് ജയിൽ മോചനം അനുവദിക്കാനാകില്ലെന്ന് സുപ്രീം കോടതി. ശിക്ഷാ ഇളവ് ഉൾപ്പെടെ 25 വർഷം പൂർത്തിയായ സാഹചര്യത്തിൽ മോചനം അനുവദിക്കണമെന്നാവശ്യപ്പെട്ട് നൽകിയ ഹർജിയിലാണ് സുപ്രീം കോടതിയുടെ നിർണായക നടപടി.

മോചനത്തിനായി ആദ്യം ബോംബെ ഹൈക്കോടതിയെയാണ് അബു സലീം സമീപിച്ചത്. എന്നാൽ ഹർജി സമർപ്പിക്കാൻ സമയമായിട്ടില്ലെന്ന് ചൂണ്ടിക്കാട്ടി ഹൈക്കോടതി അപേക്ഷ തള്ളുകയായിരുന്നു. ഇതിനെ ചോദ്യം ചെയ്താണ് സലീം സുപ്രീം കോടതിയിലെത്തിയത്.

ബോംബെ ഹൈക്കോടതിയുടെ ഉത്തരവിൽ ഇടപെടാൻ സുപ്രീം കോടതി വിസമ്മതിച്ചു. ഇതോടെ സലീമിന്റെ മോചനത്തിനായുള്ള നിലവിലെ നിയമനടപടിക്ക് തിരിച്ചടിയായി. ഏപ്രിലിലും അബു സലീമിന്റെ സമാന ആവശ്യം സുപ്രീം കോടതി തള്ളിയിരുന്നു.

2030 വരെ ശിക്ഷാ കാലാവധി
അബു സലീമിന്റെ 25 വർഷത്തെ ശിക്ഷാ കാലാവധി 2030ലാണ് പൂർത്തിയാകുന്നതെന്നാണ് കോടതിയിൽ വ്യക്തമാക്കപ്പെട്ടത്. ഇതിന് മുമ്പ് തന്നെ മോചനം ആവശ്യപ്പെട്ട് നൽകിയ ഹർജിയാണ് ബോംബെ ഹൈക്കോടതി തള്ളിയത്. ശിക്ഷാ കാലാവധി, ശിക്ഷാ ഇളവ് എന്നിവ സംബന്ധിച്ച നിയമവശങ്ങൾ പരിഗണിച്ച ശേഷമാണ് കോടതി നിലപാട് സ്വീകരിച്ചത്.

പോർച്ചുഗലിൽ അറസ്റ്റിലായ സലീമിനെ 2005ലാണ് ഇന്ത്യയിലേക്ക് നാടുകടത്തിയത്. കൈമാറുന്നതിനിടെ പോർച്ചുഗലിന് നൽകിയ ഉറപ്പുകൾ ഉൾപ്പെടെയുള്ള വിഷയങ്ങളും അദ്ദേഹത്തിന്റെ ശിക്ഷയുമായി ബന്ധപ്പെട്ട നിയമനടപടികളിൽ പ്രധാനമായിരുന്നു.

1993ലെ മുംബൈ സ്ഫോടന പരമ്പര
1993 മാർച്ച് 12നാണ് മുംബൈയെ നടുക്കിയ തുടർച്ചയായ ബോംബ് സ്ഫോടനങ്ങൾ നടന്നത്. നഗരത്തിലെ വിവിധ സ്ഥലങ്ങളിലായി 12 സ്ഫോടനങ്ങളാണ് ഉണ്ടായത്. സ്ഫോടനങ്ങളിൽ 250ലേറെ പേർ കൊല്ലപ്പെടുകയും 700ലേറെ പേർക്ക് പരിക്കേൽക്കുകയും ചെയ്തു.

മുംബൈ സ്റ്റോക്ക് എക്സ്ചേഞ്ച്, എയർ ഇന്ത്യ ബിൽഡിംഗ്, സീനിമാ ഹാൾ ഉൾപ്പെടെ നഗരത്തിലെ പ്രധാന കേന്ദ്രങ്ങളാണ് ആക്രമണത്തിന് ലക്ഷ്യമിട്ടത്. രാജ്യത്തെ നടുക്കിയ ഏറ്റവും വലിയ ഭീകരാക്രമണ പരമ്പരകളിലൊന്നായി 1993ലെ മുംബൈ സ്ഫോടനങ്ങൾ കണക്കാക്കപ്പെടുന്നു.

കേസിലെ അന്വേഷണത്തിൽ ദാവൂദ് ഇബ്രാഹിമിന്റെ ഡി-കമ്പനിക്കുള്ള ബന്ധവും പുറത്തുവന്നിരുന്നു. ഗൂഢാലോചന, സ്ഫോടക വസ്തുക്കളുടെ ഗതാഗതം, ആയുധങ്ങൾ എത്തിക്കൽ തുടങ്ങിയ കുറ്റകൃത്യങ്ങളിൽ അബു സലീമിന്റെ പങ്ക് അന്വേഷണത്തിൽ കണ്ടെത്തുകയായിരുന്നു.

മുംബൈയിലെ പ്രത്യേക ടാഡ കോടതിയാണ് പിന്നീട് അബു സലീമിന് ജീവപര്യന്തം തടവ് ശിക്ഷ വിധിച്ചത്. തുടർന്ന് ശിക്ഷ അനുഭവിച്ചുവരുന്ന സലീം മോചനത്തിനായി വിവിധ ഘട്ടങ്ങളിൽ കോടതികളെ സമീപിച്ചിരുന്നു.