റിയാദ്: ക്ലബ്ബ് ഫുട്ബോളില് ചരിത്രനേട്ടവുമായി ക്രിസ്റ്റ്യാനോ റൊണാള്ഡോയുടെ അല്നസര്. പ്രധാന ആഭ്യന്തര ലീഗുകളിലെ തുടര്ച്ചയായ ഏറ്റവും കൂടുതല് മത്സരങ്ങളില് ഗോള് നേടുന്ന ക്ലബ്ബെന്ന റെക്കോര്ഡാണ് സൗദി ക്ലബ് സ്വന്തമാക്കിയത്. തുടര്ച്ചയായ 94 മത്സരങ്ങളില് ഗോള് നേടിയതോടെയാണ് അല്നസര് പുതിയ ചരിത്രം കുറിച്ചത്. സൗദി പ്രോ ലീഗില് അല് ഖലീജിനെതിരായ മത്സരത്തിലാണ് അല്നസര് റെക്കോര്ഡ് നേട്ടത്തിലെത്തിയത്. മത്സരം 1-1ന് സമനിലയില് അവസാനിച്ചു. ഇതോടെ തുടര്ച്ചയായി 93 മത്സരങ്ങളില് ഗോള് നേടിയ അര്ജന്റൈന് ക്ലബ് റിവര് പ്ലേറ്റിന്റെ റെക്കോര്ഡാണ് അല്നസര് മറികടന്നത്. 1936 മുതല് 1939 വരെയായിരുന്നു റിവര് പ്ലേറ്റിന്റെ റെക്കോര്ഡ്.
2023 ഡിസംബറില് സൗദി പ്രോ ലീഗില് ഗോള് നേടിയതോടെയാണ് അല്നസറിന്റെ റെക്കോര്ഡ് ഗോള്വേട്ടയ്ക്ക് തുടക്കമായത്. പിന്നീട് കളിച്ച ഓരോ മത്സരത്തിലും എതിരാളികളുടെ വല കുലുക്കാന് ടീമിന് സാധിച്ചു. ക്രിസ്റ്റ്യാനോ റൊണാള്ഡോ അല്നസറിലെത്തിയതിന് പിന്നാലെയാണ് ടീമിന്റെ ഈ ചരിത്രനേട്ടം. 2023ല് സൗദി ക്ലബ്ബിലെത്തിയ പോര്ച്ചുഗീസ് സൂപ്പര് താരം ഇതുവരെ സൗദി പ്രോ ലീഗില് 113 മത്സരങ്ങളില് നിന്ന് 105 ഗോളുകള് നേടിയിട്ടുണ്ട്.
നിലവില് സൗദി പ്രോ ലീഗ് പോയിന്റ് പട്ടികയില് മൂന്നാം സ്ഥാനത്താണ് അല്നസര്. ഏഴ് മത്സരങ്ങളില് നിന്ന് 16 പോയിന്റാണ് ടീമിന്റെ സമ്പാദ്യം. അഞ്ച് മത്സരങ്ങളില് ജയിച്ച അല്നസര് ഒരു മത്സരം സമനിലയിലും ഒരു മത്സരം തോല്വിയിലും അവസാനിപ്പിച്ചു.
