ടോക്ക്യോ: ജപ്പാനില് 100 വയസ്സോ അതില് കൂടുതലോ പ്രായമുള്ളവരുടെ എണ്ണം ചരിത്രത്തിലാദ്യമായി ഒരു ലക്ഷം കടന്നു. ആരോഗ്യമന്ത്രാലയത്തിന്റെ കണക്കുകള് പ്രകാരം രാജ്യത്ത് നിലവില് 1,07,677 പേര് നൂറാം വയസ്സ് പിന്നിട്ടിട്ടുണ്ട്. ഇവരില് 88 ശതമാനവും സ്ത്രീകളാണ്. ക്യോട്ടോയില് നിന്നുള്ള 114 വയസ്സുകാരി ഫുയോ കിഷിമോട്ടോയാണ് ഏറ്റവും പ്രായം കൂടിയ സ്ത്രീ. കുമാമോട്ടോയില് നിന്നുള്ള 112 വയസ്സുകാരന് ഹികാരു കാറ്റോയാണ് ഏറ്റവും പ്രായം കൂടിയ പുരുഷന്.
1963ല് കണക്കെടുപ്പ് ആരംഭിക്കുമ്പോള് ജപ്പാനില് നൂറുവയസ്സ് പിന്നിട്ടവര് 153 പേര് മാത്രമായിരുന്നു. 1981ല് എണ്ണം 1,000വും 1998ല് 10,000വും കടന്നു. ആരോഗ്യകരമായ ഭക്ഷണശീലങ്ങളും വ്യായാമവും വൈദ്യശാസ്ത്ര രംഗത്തെ പുരോഗതിയും ദീര്ഘായുസ്സിന് കാരണങ്ങളായി വിദഗ്ധര് ചൂണ്ടിക്കാട്ടുന്നു. അതേസമയം, പ്രായമായവരുടെ എണ്ണം വര്ധിക്കുന്നതിനൊപ്പം ജനനനിരക്ക് കുറയുന്നത് ജപ്പാന്റെ പ്രധാന സാമൂഹിക വെല്ലുവിളിയായി തുടരുകയാണ്. രാജ്യത്തെ ജനസംഖ്യയുടെ ഏകദേശം 30 ശതമാനവും 65 വയസ്സിന് മുകളിലുള്ളവരാണ്.
നിലവിലെ പ്രത്യുത്പാദന നിരക്ക് 1.14 ആണ്. നാഷണല് ഇന്സ്റ്റിറ്റ്യൂട്ട് ഓഫ് പോപ്പുലേഷന് ആന്ഡ് സോഷ്യല് സെക്യൂരിറ്റി റിസര്ച്ചിന്റെ കണക്കനുസരിച്ച് 2070ഓടെ ജപ്പാനിലെ ജനസംഖ്യ 87 ദശലക്ഷമായി കുറയുകയും 65 വയസ്സിന് മുകളിലുള്ളവരുടെ വിഹിതം 40 ശതമാനത്തോളമാകുകയും ചെയ്യുമെന്നാണ് കണക്ക്. ജനസംഖ്യാ ഇടിവ് തടയാന് സര്ക്കാര് വിവിധ പദ്ധതികളും സബ്സിഡികളും നടപ്പാക്കുന്നുണ്ടെങ്കിലും ജനനനിരക്കില് കാര്യമായ വര്ധനയുണ്ടായിട്ടില്ല.
