കൊച്ചി: ‘ഓപ്പറേഷന് ഡൊമിനോ’യുടെ ഭാഗമായി അന്തര്സംസ്ഥാന കൊക്കെയ്ന് കടത്ത് ശൃംഖല തകര്ത്ത് നാര്ക്കോട്ടിക്സ് കണ്ട്രോള് ബ്യൂറോ (എന്സിബി) കൊച്ചി സോണല് യൂണിറ്റ്. യുഎഇയില്നിന്ന് നാടുകടത്തപ്പെട്ട മൂന്ന് പേരും രണ്ട് വിദേശികളും ഉള്പ്പെടെ ഏഴ് പേരെയാണ് എന്സിബി പിടികൂടിയത്. ഇവരില്നിന്ന് 16.55 ലക്ഷം രൂപ വിലമതിക്കുന്ന 33.1 ഗ്രാം കൊക്കെയ്ന് പിടിച്ചെടുത്തു.
മയക്കുമരുന്ന് കേസുകളില് ഉള്പ്പെട്ട് യുഎഇയില്നിന്ന് നാടുകടത്തപ്പെട്ടവരെ കേന്ദ്രീകരിച്ച് എന്സിബി നടത്തിയ നിരീക്ഷണത്തിലാണ് സംഘത്തെക്കുറിച്ച് നിര്ണായക വിവരങ്ങള് ലഭിച്ചത്. സെപ്റ്റംബര് 10ന് കോഴിക്കോട് ഫറോക്ക് റെയില്വേ സ്റ്റേഷനില്വച്ച് പഞ്ചാബിലെ കപൂര്ത്തല സ്വദേശി ഗുര്പ്രീത് സിങ്, കോഴിക്കോട് ബേപ്പൂര് സ്വദേശി ഹംദാന് അഹമ്മദ്, അരക്കിണര് സ്വദേശി അഫ്ലഹ് പി. എന്നിവരെ 8.12 ഗ്രാം കൊക്കെയ്നുമായി അറസ്റ്റ് ചെയ്തു. ബെംഗളൂരുവില്നിന്നാണ് ലഹരിവസ്തുക്കള് വാങ്ങിയതെന്ന് ഇവര് മൊഴി നല്കിയതായി എന്സിബി അറിയിച്ചു.
ഇവരില്നിന്ന് ലഭിച്ച വിവരത്തിന്റെ അടിസ്ഥാനത്തില് സെപ്റ്റംബര് 10ന് തിരുവനന്തപുരത്തുനിന്ന് കോഴിക്കോട്ടേക്ക് യാത്ര ചെയ്യുകയായിരുന്ന സിദ്ധാര്ഥ് ദാമോറിനെയും എന്സിബി കസ്റ്റഡിയിലെടുത്തു. ഊട്ടിയിലെ റിസോര്ട്ട് ഉടമയായ സിദ്ധാര്ഥ് കേരളത്തിലെ ഡിജെ പാര്ട്ടികളില് സജീവമായിരുന്നുവെന്നാണ് അന്വേഷണസംഘം കണ്ടെത്തിയത്. തുടര്ന്നുള്ള അന്വേഷണത്തിലാണ് ബെംഗളൂരുവില് ഐടി മേഖലയില് ജോലി ചെയ്യുന്ന തമിഴ്നാട് സ്വദേശി അരുണ് രാജ്കുമാര് ലഹരി വിതരണത്തിലെ പ്രധാന കണ്ണിയാണെന്ന് കണ്ടെത്തിയത്. വിദേശികളില്നിന്ന് കൊക്കെയ്ന് ശേഖരിച്ച് മറ്റ് ലഹരി വില്പ്പനക്കാര്ക്കും ഉപഭോക്താക്കള്ക്കും എത്തിച്ചിരുന്നത് അരുണ് രാജ്കുമാറാണെന്നാണ് എന്സിബിയുടെ കണ്ടെത്തല്.
നൈജീരിയന് പൗര ചിസോബ ഹെലന് ആന്റണി (സോണിയ), സിംബാബ്വെ പൗരന് മുഫുകാരെ വിറ്റാലിസ് തദിസ്വനാഷെ എന്നിവരാണ് പിടിയിലായ മറ്റ് രണ്ട് പേര്. സെപ്റ്റംബര് 12, 13 തീയതികളിലായി ബെംഗളൂരുവില്നിന്നാണ് ഇവരെ പിടികൂടിയത്. മെഡിക്കല് അറ്റന്ഡന്റ് വിസയിലെത്തി 10 വര്ഷമായി അനധികൃതമായി രാജ്യത്ത് കഴിഞ്ഞിരുന്ന ചിസോബയുടെ പക്കല്നിന്ന് 16 ഗ്രാം കൊക്കെയ്നും സ്റ്റുഡന്റ് വിസയിലെത്തി രണ്ട് വര്ഷമായി അനധികൃതമായി രാജ്യത്ത് കഴിഞ്ഞിരുന്ന മുഫുകാരെയില്നിന്ന് 8.98 ഗ്രാം കൊക്കെയ്നും പിടിച്ചെടുത്തു.
സിദ്ധാര്ഥ് ദാമോര്, ഹംദാന് അഹമ്മദ്, അഫ്ലഹ് എന്നിവര് നേരത്തെ യുഎഇയില് മയക്കുമരുന്ന് കേസില് തടവുശിക്ഷ അനുഭവിച്ച് നാടുകടത്തപ്പെട്ടവരാണെന്നും എന്സിബി അറിയിച്ചു. തടവുകാലത്ത് പരിചയപ്പെട്ട അഫ്ലഹ്, ഗുര്പ്രീത്, സിദ്ധാര്ഥ് എന്നിവര് ചേര്ന്നാണ് പുതിയ ലഹരി ശൃംഖല രൂപീകരിക്കാന് ശ്രമിച്ചതെന്നാണ് അന്വേഷണത്തിലെ കണ്ടെത്തല്. ശൃംഖലയിലെ കൂടുതല് കണ്ണികളെ കണ്ടെത്തി തകര്ക്കാനുള്ള അന്വേഷണം തുടരുകയാണെന്ന് എന്സിബി വ്യക്തമാക്കി. ലഹരിക്കടത്തുമായി ബന്ധപ്പെട്ട വിവരങ്ങള് പൊതുജനങ്ങള്ക്ക് ‘മാനസ്’ ടോള് ഫ്രീ നമ്പറായ 1933ല് അറിയിക്കാം. വിവരം നല്കുന്നവരുടെ വ്യക്തിവിവരങ്ങള് രഹസ്യമായി സൂക്ഷിക്കുമെന്നും എന്സിബി അറിയിച്ചു.
