നഗോയ: ജപ്പാനില് നടക്കുന്ന ഏഷ്യന് ഗെയിംസിനെത്തിയ ഇന്ത്യന് കായികതാരങ്ങള്ക്ക് താമസസൗകര്യം ലഭിക്കാന് മണിക്കൂറുകളോളം കാത്തിരിക്കേണ്ടിവന്നതായി റിപ്പോര്ട്ട്. നഗോയയിലെത്തിയ ഇന്ത്യന് സംഘത്തിലെ ചിലര്ക്ക് മുറികള് ലഭിക്കാന് 14 മണിക്കൂറിലേറെ കാത്തിരിക്കേണ്ടിവന്നു. ചില താരങ്ങള്ക്ക് ലഭിച്ച മുറികള് പങ്കിടേണ്ടിവന്നതായും റിപ്പോര്ട്ടുകളുണ്ട്. നേരത്തെ ബുക്ക് ചെയ്തിരുന്ന മുറികള് ലഭ്യമാകാതിരുന്നതിനെ തുടര്ന്ന് ചില താരങ്ങളെയും സംഘാംഗങ്ങളെയും താല്ക്കാലികമായി ഹോട്ടലുകളിലേക്ക് മാറ്റേണ്ടിവന്നതായും റിപ്പോര്ട്ടുണ്ട്. ഇന്ത്യയ്ക്ക് പുറമെ മറ്റ് രാജ്യങ്ങളുടെ സംഘങ്ങളും സമാനമായ താമസപ്രശ്നങ്ങള് നേരിട്ടിട്ടുണ്ട്.
ഇന്ത്യന് റോയിങ് സംഘമാണ് പ്രധാനമായും പ്രതിസന്ധി നേരിട്ടത്. ക്രൂയിസ് കപ്പലില് താമസിക്കേണ്ടിയിരുന്ന താരങ്ങളില് പലര്ക്കും മണിക്കൂറുകള് കഴിഞ്ഞിട്ടും മുറി ലഭിച്ചില്ല. മുറി ലഭിച്ച ചിലരോട് മറ്റ് താരങ്ങളുമായി താമസം പങ്കിടാനും ആവശ്യപ്പെട്ടതായി റിപ്പോര്ട്ടുകളുണ്ട്. രജിസ്ട്രേഷന് സംവിധാനത്തിലെ പ്രശ്നങ്ങളും പ്രതിസന്ധി രൂക്ഷമാക്കി. ഷൂട്ടിങ് സംഘത്തിനും താമസസ്ഥലത്തുനിന്ന് പരിശീലനകേന്ദ്രത്തിലേക്ക് രണ്ട് മണിക്കൂറിലേറെ യാത്ര ചെയ്യേണ്ട സാഹചര്യമുണ്ടായതായി റിപ്പോര്ട്ടുണ്ട്. പരിശീലനവേദികളില് കുടിവെള്ളം ഉള്പ്പെടെയുള്ള അടിസ്ഥാന സൗകര്യങ്ങളുടെ അഭാവത്തെക്കുറിച്ചും പരാതിയുണ്ട്.
മുന് ഏഷ്യന് ഗെയിംസുകളില് നിന്ന് വ്യത്യസ്തമായി ഇത്തവണ പരമ്പരാഗത രീതിയിലുള്ള ഒരൊറ്റ ഗെയിംസ് വില്ലേജ് ഒരുക്കിയിട്ടില്ല. ചെലവ് കുറയ്ക്കുന്നതിന്റെ ഭാഗമായി ക്രൂയിസ് കപ്പല്, ഹോട്ടലുകള്, താല്ക്കാലിക കണ്ടെയ്നര് താമസസൗകര്യങ്ങള് എന്നിവയിലായാണ് താരങ്ങളെയും ഉദ്യോഗസ്ഥരെയും പാര്പ്പിക്കുന്നത്. ഏകദേശം 5,000 പേര്ക്ക് ക്രൂയിസ് കപ്പലില് താമസസൗകര്യമൊരുക്കിയിട്ടുണ്ട്.
ആദ്യഘട്ടത്തില് ഏകദേശം 15,000 പേരെ പ്രതീക്ഷിച്ചിരുന്നെങ്കിലും പുതിയ ഇനങ്ങള് ഉള്പ്പെടെയുള്ള കാരണങ്ങളാല് പങ്കെടുക്കുന്നവരുടെ എണ്ണം 17,000ഓളം ആയി ഉയര്ന്നതാണ് താമസക്രമീകരണങ്ങളില് ആശയക്കുഴപ്പത്തിന് കാരണമായതെന്ന് സംഘാടകരുടെ വിശദീകരണം. എല്ലാ രജിസ്റ്റര് ചെയ്തവര്ക്കും താമസസൗകര്യം ഉറപ്പാക്കാനുള്ള നടപടികള് തുടരുകയാണെന്നും അധികൃതര് വ്യക്തമാക്കിയിട്ടുണ്ട്.
