തിരുവനന്തപുരം: സംസ്ഥാനത്തെ എല്ലാ പോലീസ് ജില്ലകളിലും ഇനി എല്ലാ മാസവും നാലാമത്തെ ശനിയാഴ്ച ‘അഭിനന്ദന ദിനം’ (അപ്രിസിയേഷൻ ഡേ) ആയി ആചരിക്കും. പോലീസ് ഉദ്യോഗസ്ഥരുടെയും പൊതുജനങ്ങളുടെയും മികച്ച പ്രവർത്തനങ്ങളെ അംഗീകരിക്കുകയും ആദരിക്കുകയും ചെയ്യുന്നതിനാണ് പുതിയ സംരംഭം. ക്രമസമാധാന വിഭാഗം എഡിജിപി പി. വിജയൻ ഇതുസംബന്ധിച്ച് എല്ലാ ജില്ലാ പോലീസ് മേധാവിമാർക്കും നിർദേശം നൽകി.
പോലീസ് ഉദ്യോഗസ്ഥരുടെ ആത്മവീര്യം വർധിപ്പിക്കുക, കർത്തവ്യനിർവഹണത്തിൽ കൂടുതൽ മികവ് പുലർത്താൻ അവരെ പ്രോത്സാഹിപ്പിക്കുക, പോലീസ് പ്രവർത്തനങ്ങളിൽ പൊതുജനങ്ങളുടെ പങ്കാളിത്തവും സഹകരണവും വർധിപ്പിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.
ജില്ലാ, യൂണിറ്റ് ആസ്ഥാനങ്ങളിൽ സംഘടിപ്പിക്കുന്ന ചടങ്ങുകളിൽ മുൻ മാസത്തെ പ്രവർത്തനത്തിന്റെ അടിസ്ഥാനത്തിൽ മികച്ച ഉദ്യോഗസ്ഥരെ കണ്ടെത്തി ആദരിക്കും. മികച്ച സേവനം, മാതൃകാപരമായ പെരുമാറ്റം, മികച്ച അന്വേഷണ മികവ്, ധീരതാപ്രവർത്തനം, കർത്തവ്യനിർവഹണത്തിലെ സമർപ്പണം തുടങ്ങിയ മേഖലകളിൽ ശ്രദ്ധേയമായ പ്രകടനം കാഴ്ചവച്ചവരെയാണ് പരിഗണിക്കുക.
പോലീസ് ഉദ്യോഗസ്ഥർക്ക് മാത്രമല്ല, പൊതുജനങ്ങൾക്കും ഈ അംഗീകാരത്തിന്റെ ഭാഗമാകാം. പൊതുസുരക്ഷയ്ക്കായി പ്രവർത്തിച്ചവരെയും പോലീസിന് വിലപ്പെട്ട സഹായം നൽകിയവരെയും കണ്ടെത്തി ആദരിക്കണമെന്ന് എഡിജിപിയുടെ നിർദേശത്തിൽ വ്യക്തമാക്കുന്നു. ഇതിലൂടെ പോലീസും പൊതുസമൂഹവും തമ്മിലുള്ള സഹകരണവും പങ്കാളിത്തവും കൂടുതൽ ശക്തമാക്കുകയാണ് ലക്ഷ്യം.
തിരഞ്ഞെടുക്കപ്പെടുന്ന പോലീസ് ഉദ്യോഗസ്ഥർക്കും പൗരന്മാർക്കും അഭിനന്ദന സർട്ടിഫിക്കറ്റുകൾ, മെമന്റോകൾ അല്ലെങ്കിൽ അനുയോജ്യമായ മറ്റ് അംഗീകാരങ്ങൾ നൽകും. സഹപ്രവർത്തകരുടെയും പോലീസ് ജീവനക്കാരുടെയും പൊതുജനങ്ങളുടെയും സാന്നിധ്യത്തിൽ ചടങ്ങുകൾ സംഘടിപ്പിക്കണമെന്നും നിർദേശമുണ്ട്.
എല്ലാ ജില്ലാ പോലീസ് മേധാവിമാരും അഭിനന്ദന ദിന പരിപാടിയിൽ നിർബന്ധമായും പങ്കെടുക്കണം. സോണൽ ഐജിമാരും റേഞ്ച് ഡിഐജിമാരും സാധ്യമാകുന്നിടത്തോളം പരിപാടികളിൽ പങ്കെടുക്കണമെന്നും നിർദേശിച്ചിട്ടുണ്ട്.
ഏതെങ്കിലും കാരണത്താൽ നാലാമത്തെ ശനിയാഴ്ച പരിപാടി നടത്താൻ കഴിയാത്ത സാഹചര്യമുണ്ടായാൽ, അതേ മാസത്തിൽ തന്നെ മറ്റൊരു ദിവസം ചടങ്ങ് സംഘടിപ്പിക്കണം. പരിപാടിയുടെ തുടർച്ച ഉറപ്പാക്കുന്നതിനാണ് ഈ വ്യവസ്ഥ.
ഓരോ മാസവും ആദരിക്കപ്പെടുന്ന പോലീസ് ഉദ്യോഗസ്ഥരുടെയും പൊതുജനങ്ങളുടെയും വിവരങ്ങൾ ജില്ലാ തലത്തിൽ രേഖപ്പെടുത്തണം. അംഗീകരിക്കപ്പെട്ട പ്രവർത്തനത്തിന്റെ സ്വഭാവവും രേഖയിൽ ഉൾപ്പെടുത്തണം. തുടർന്ന് പരിപാടിയുടെ റിപ്പോർട്ടും ചിത്രങ്ങളും അടുത്ത മാസത്തെ ഒന്നാം തീയതിക്ക് മുമ്പായി ക്രമസമാധാന വിഭാഗം എഡിജിപിക്ക് സമർപ്പിക്കണമെന്നും നിർദേശത്തിൽ പറയുന്നു.
മികച്ച സേവനം കാഴ്ചവയ്ക്കുന്ന പോലീസ് ഉദ്യോഗസ്ഥർക്ക് ഔദ്യോഗികമായി അംഗീകാരം നൽകുന്നതിനൊപ്പം, പൊതുസുരക്ഷയിലും പോലീസ് പ്രവർത്തനങ്ങളിലും നിർണായകമായി സഹകരിക്കുന്ന പൗരന്മാരെയും ഒരേ വേദിയിൽ ആദരിക്കുന്ന രീതിയിലാണ് പുതിയ ‘അഭിനന്ദന ദിനം’ ആവിഷ്കരിച്ചിരിക്കുന്നത്.
