ഹൈദരാബാദ്: വീട്ടുമുറ്റത്ത് കളിക്കുന്നതിനിടെ കാറിനുള്ളിൽ കുടുങ്ങിയ നാല് വയസുകാരിക്ക് ദാരുണാന്ത്യം. ഭദ്രാദ്രി കൊത്തഗുഡെം ജില്ലയിലെ ജൂലൂരുപാട് മണ്ഡലത്തിലെ വിനോബാനഗറിലാണ് അപകടം നടന്നത്.
ഗ്രാമ സർപഞ്ച് ഗംഗാവത് നവീന്റെ മൂത്ത മകൾ തൻവി ശ്രീയാണ് മരിച്ചത്. ഞായറാഴ്ച രാവിലെയാണ് കുട്ടി വീടിന് സമീപം കളിക്കുന്നതിനിടെ കാറിനുള്ളിൽ കയറിയത്. ഇതിനുപിന്നാലെ കാറിന്റെ ഡോറുകൾ ലോക്കായതോടെ കുട്ടി പുറത്തുകടക്കാനാകാതെ കുടുങ്ങുകയായിരുന്നു.
കുട്ടിയെ കാണാതായതോടെ കുടുംബാംഗങ്ങൾ സമീപപ്രദേശങ്ങളിൽ മണിക്കൂറുകളോളം തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് കാറിനുള്ളിൽ പരിശോധിച്ചപ്പോഴാണ് മുൻസീറ്റുകൾക്കിടയിൽ കുട്ടിയെ അബോധാവസ്ഥയിൽ കണ്ടെത്തിയത്.
കാറിന്റെ ചില്ല് തകർത്ത് കുട്ടിയെ പുറത്തെടുത്ത് ഉടൻ കൊത്തഗുഡെം സർക്കാർ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കാറിനുള്ളിൽ ഏറെ നേരം കുടുങ്ങിയതിനെ തുടർന്ന് ശ്വാസംമുട്ടിയാണ് മരണമെന്നാണ് പൊലീസിന്റെ പ്രാഥമിക നിഗമനം. രാവിലെ മാതാപിതാക്കളോടൊപ്പം കളിച്ചും സംസാരിച്ചും കഴിഞ്ഞ കുട്ടിയെ മണിക്കൂറുകൾക്കകം മരിച്ച നിലയിൽ വീട്ടിലെത്തിക്കേണ്ടിവന്നതിന്റെ ഞെട്ടലിലാണ് കുടുംബം.
