ജയ്സാൽമർ: ബെൽജിയത്തിൽ നിന്ന് ലഭിച്ച 5.10 കോടി രൂപയുടെ വിദേശഫണ്ട് മതപരിവർത്തന പ്രവർത്തനങ്ങൾക്ക് ഉപയോഗിച്ചെന്ന ആരോപണത്തിൽ ജയ്സാൽമറിൽ എൻഫോഴ്സ്മെന്റ് ഡയറക്ടറേറ്റിന്റെ (ED) പരിശോധന. FEMA നിയമപ്രകാരം ജയ്സാൽമറിലെ രണ്ട് കേന്ദ്രങ്ങളിലാണ് പരിശോധന നടത്തിയത്. ബെൽജിയം ആസ്ഥാനമായുള്ള സ്ഥാപനത്തിൽ നിന്ന് ലഭിച്ച പണം നിർദേശിച്ച ആവശ്യങ്ങൾക്കല്ലാതെ മറ്റ് പ്രവർത്തനങ്ങൾക്ക് ഉപയോഗിച്ചെന്നാണ് പ്രാഥമിക കണ്ടെത്തൽ.
ജയ്സാൽമർ സ്വദേശികളായ ദേവു റാം, ഗ്യാൻ ചന്ദ് എന്നിവർ മുഖേനയാണ് ബെൽജിയത്തിൽ നിന്ന് ഏകദേശം 5.10 കോടി രൂപ ലഭിച്ചത്. ഇതിൽ ഭൂരിഭാഗവും ബ്രസൽസ് ആസ്ഥാനമായ Amar ASBL എന്ന സ്ഥാപനത്തിൽ നിന്നുള്ളതാണ്. വിദ്യാഭ്യാസ സേവനങ്ങൾ, സാംസ്കാരിക-വിനോദ പ്രവർത്തനങ്ങൾ തുടങ്ങിയ ആവശ്യങ്ങൾക്കായാണ് പണം എന്നാണ് ബാങ്ക് രേഖകളിൽ ഇവർ കാണിച്ചിരുന്നത്. എന്നാൽ വിദ്യാഭ്യാസ സഹായത്തിന്റെ മറവിൽ പ്രദേശത്തെ ദുർബല വിഭാഗങ്ങളുടെ സാംസ്കാരികവും മതപരവുമായ വിശ്വാസങ്ങളെ സ്വാധീനിക്കുന്നതിനാണ് പണം ഉപയോഗിച്ചത്.
ജോസ് ഗോഫിനെറ്റും മകൻ സാലിയൻ ഗോഫിനെറ്റും എന്നിവരാണ് Amar ASBL എന്ന സ്ഥാപത്തിന് പിന്നിൽ. 2011ൽ ബ്രസൽസിലാണ് ഇത് ആരംഭിച്ചത്. മതപരിവർത്തനം ലക്ഷ്യമിട്ടാണ് ഇവരുടെ പ്രവർത്തനം എന്നാണ് നിഗമനം. 14–15 വർഷമായി ജയ്സാൽമർ കേന്ദ്രീകരിച്ച് ഇവർ പ്രവർത്തിക്കുന്നുണ്ട്. എന്നാൽ ഇന്ത്യയിൽ ട്രസ്റ്റോ എൻജിഒയോ രജിസ്റ്റർ ചെയ്തിട്ടില്ല. ദേവു റാമിന്റെയും ഗ്യാൻ ചന്ദിന്റെയും സഹായത്തോടെയാണ് പ്രവർത്തനങ്ങൾ നടത്തിയിരുന്നതെന്നും ED വ്യക്തമാക്കി. ജോസ് ഗൊഫിനെറ്റും സാലിയൻ ഗൊഫിനെറ്റും എല്ലാ വർഷവും രണ്ടോ മൂന്നോ ആഴ്ച ജയ്സാൽമറിൽ എത്താറുണ്ടെന്നും മതപരമായ പരിപാടികൾ സംഘടിപ്പിക്കാറുണ്ടെന്നും ഇഡി കണ്ടെത്തി.
ലഭിച്ച തുകയിൽ ഏകദേശം 2.60 കോടി രൂപ ദേവു റാം പണമായി പിൻവലിച്ചതായും വിദേശഫണ്ടിന്റെ വരവും ചെലവും സംബന്ധിച്ച കൃത്യമായ അക്കൗണ്ട് രേഖകൾ സൂക്ഷിച്ചിരുന്നില്ലെന്നും അന്വേഷണ ഏജൻസി പറഞ്ഞു. ദേവു റാമിന്റെയും ഗ്യാൻ ചന്ദിന്റെയും അക്കൗണ്ടുകളിലേക്ക് വിദേശത്തുനിന്നുള്ള പണമിടപാടുകൾ ബാങ്കുകൾ തടഞ്ഞതിനെ തുടർന്ന് ബന്ധപ്പെട്ട മറ്റ് വ്യക്തികളുടെ വ്യക്തിഗത അക്കൗണ്ടുകളിലൂടെ പണം എത്തിക്കാൻ ശ്രമം നടന്നതായും ED പറഞ്ഞു. പരിശോധനയിൽ രേഖകളും ഡിജിറ്റൽ തെളിവുകളും കണ്ടെത്തിയതായി ഏജൻസി അറിയിച്ചു. സംഭവത്തിൽ കൂടുതൽ അന്വേഷണം തുടരുകയാണ്.
