കൊച്ചി: തൃപ്പൂണിത്തുറ ഗവണ്മെന്റ് സംസ്കൃത കോളേജിലെ ക്യാമ്പസ് തിരഞ്ഞെടുപ്പില് 12 സീറ്റുകളിലും വിജയിച്ചതായി അഖില ഭാരതീയ വിദ്യാര്ത്ഥി പരിഷത്ത് (എബിവിപി). തിരഞ്ഞെടുപ്പ് ഫലത്തെ ‘ചരിത്രപരമായ മുന്നേറ്റം’ എന്നാണ് എബിവിപി വിശേഷിപ്പിച്ചത്. കോളേജിലെ 12 സീറ്റുകളിലേക്കും എബിവിപി സ്ഥാനാര്ഥികള് വിജയിച്ചതായി സംഘടന അറിയിച്ചു. ഇതോടെ ക്യാമ്പസിലെ സ്റ്റുഡന്റ്സ് ഫെഡറേഷന് ഓഫ് ഇന്ത്യയുടെ (എസ്എഫ്ഐ) നാല് പതിറ്റാണ്ട് നീണ്ട ആധിപത്യം അവസാനിച്ചെന്ന് എബിവിപി വ്യക്തമാക്കി.
കേരളത്തിലെ സംഘടനാ പ്രവര്ത്തനങ്ങള്ക്ക് പുതിയ അധ്യായത്തിന് തുടക്കമായിരിക്കുകയാണ് ഈ വിജയമെന്നും എബിവിപി സോഷ്യല് മീഡിയയില് പങ്കുവെച്ച കുറിപ്പില് പറഞ്ഞു. പ്രവര്ത്തകരുടെയും അനുഭാവികളുടെയും തുടര്ച്ചയായ സംഘടനാ പ്രവര്ത്തനങ്ങളുടെ ഫലമാണ് വിജയമെന്നും സംഘടന വ്യക്തമാക്കി. പ്രതികൂലവും ദുഷ്കരവുമായ സാഹചര്യങ്ങള്ക്കിടയിലും പ്രവര്ത്തകര് പ്രവര്ത്തനം തുടര്ന്നതായും എബിവിപി അവകാശപ്പെട്ടു. പ്രതിസന്ധികള്ക്കിടയിലും പ്രവര്ത്തകര് മുന്നോട്ടുപോയെന്നും സംഘടനയുടെ കുറിപ്പില് പറയുന്നു.
തൃപ്പൂണിത്തുറ ഗവണ്മെന്റ് സംസ്കൃത കോളേജിലെ തിരഞ്ഞെടുപ്പില് 12 സീറ്റുകളും നേടിയെന്നത് ക്യാമ്പസിലെ സംഘടനയുടെ ശ്രദ്ധേയമായ മുന്നേറ്റമാണെന്നും എബിവിപി വിലയിരുത്തി.
