പാലക്കാട്: അട്ടപ്പാടിയുടെ കായിക ചരിത്രത്തിൽ അഭിമാനകരമായ മറ്റൊരു നേട്ടം കൂടി. മല്ലേശ്വര വിദ്യാനികേതനിലെ വിദ്യാർത്ഥിയായ മനീഷ് എം ദേശീയ കബഡി ടീമിലേക്ക് തിരഞ്ഞെടുക്കപ്പെട്ടു. ഗോത്ര വിഭാഗത്തിൽ നിന്നുള്ള ഈ മിടുക്കനായ താരം ദേശീയ തല മത്സരങ്ങളിൽ പങ്കെടുക്കുന്നത് ഇതാദ്യമാണ്.
സംസ്ഥാന സബ്ജൂനിയർ ബോയ്സ് കബഡി ചാമ്പ്യൻഷിപ്പിൽ പാലക്കാട് ജില്ലാ രണ്ടാം സ്ഥാനം കരസ്ഥമാക്കിയ ടീമിൽ മനീഷ് അംഗമായിരുന്നു. ഈ ടൂർണമെന്റിലെ മികച്ച പ്രകടനമാണ് താരത്തിന് ദേശീയതലത്തിലേക്കുള്ള വഴിതുറന്നത്. അധ്യാപകരുടെയും മാതാപിതാക്കളുടെയും പിന്തുണയും തന്റെ കഠിനാധ്വാനവുമാണ് ഈ നേട്ടത്തിന് പിന്നിലെന്ന് മനീഷ് പറയുന്നു.
മല്ലേശ്വര വിദ്യാനികേതനിൽ നിന്ന് തുടർച്ചയായി മൂന്നാം വർഷമാണ് ഒരു വിദ്യാർത്ഥി ദേശീയ കബഡി വേദിയിലേക്ക് എത്തുന്നത്. ഇതിനുമുമ്പ് ഋതുൽ കൃഷ്ണ എന്ന വിദ്യാർത്ഥി രണ്ടു തവണ ദേശീയതല കബഡി മത്സരങ്ങളിൽ പങ്കെടുത്തിരുന്നു.
അട്ടപ്പാടി മേഖലയിൽ നിരവധി സമൂഹിക സേവന പ്രവർത്തനങ്ങൾ നടത്തിവരുന്ന സ്വാമി വിവേകാനന്ദ മെഡിക്കൽ മിഷന്റെ കീഴിൽ മല്ലേശ്വര ട്രൈബൽ ഹോസ്റ്റലും മല്ലേശ്വര വിദ്യാനികേതനും പ്രവർത്തിക്കുന്നുണ്ട്. ഇവയുടെ സംയുക്തമായ പ്രവർത്തനത്തിലൂടെ വിദ്യാർത്ഥികളുടെ സമഗ്രമായ വികാസമാണ് ലക്ഷ്യമിടുന്നത്. അഞ്ചു വർഷം മുമ്പ് പ്രവർത്തനം ആരംഭിച്ച ഈ ഹോസ്റ്റലിലൂടെ ഇതിനോടകം മൂന്ന് തവണയാണ് കുട്ടികൾ ദേശീയതലത്തിലേക്ക് എത്തിയിട്ടുള്ളത്. അട്ടപ്പാടിയിലെ ഏക ട്രൈബൽ സ്പോർട്സ് ഹോസ്റ്റലായ ഇവിടെ കബഡി കൂടാതെ വോളിബോൾ, ഖോ-ഖോ, അത്ലറ്റിക്സ് എന്നീ കായിക ഇനങ്ങളിലും കുട്ടികൾക്ക് പരിശീലനം നൽകിവരുന്നുണ്ട്.
