കൊല്ലം: സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ ഓർമദിനത്തിൽ സ്ഥാപിച്ച ഫ്ലക്സ് ബോർഡ് SFI പ്രവർത്തകൻ വലിച്ചുകീറി.കൊല്ലം ചിന്നക്കടയിൽ നിന്ന് പാലമിറങ്ങി വരുന്ന ഭാഗത്ത് സ്ഥാപിച്ചിരുന്ന ഫ്ലക്സാണ് നശിപ്പിച്ചത്. ഇന്ന് (Oct 1) ആണ് കോടിയേരി ബാലകൃഷ്ണന്റെ ഓർമദിനം.
SN കോളേജിൽ നിന്ന് ആരംഭിച്ച SFI മാർച്ചിനിടെയാണ് സംഭവം. മാർച്ചിനിടെ വഴിയിൽ ഉണ്ടായിരുന്ന കോൺഗ്രസ്, യൂത്ത് കോൺഗ്രസ് ഫ്ലക്സുകൾ നശിപ്പിച്ച ശേഷമാണ് ചിന്നക്കടയിലെത്തിയത്. അവിടെ സ്ഥാപിച്ചിരുന്ന കോടിയേരിയുടെ ചിത്രമുള്ള ഫ്ലക്സ് ബോർഡ് ഒരു SFI പ്രവർത്തകൻ ഓടിവന്ന് വലിച്ചു താഴെയിടുകയായിരുന്നു. കോടിയേരിയുടെ മുഖം വലിച്ചുകീറുന്നതും ദൃശ്യങ്ങളിൽ വ്യക്തമാണ്.
സമീപത്തുണ്ടായിരുന്ന പൊലീസുകാരും DYFI പ്രവർത്തകരും തടയാൻ ശ്രമിച്ചെങ്കിലും ഫ്ലക്സ് വലിച്ചുകീറി സമീപത്തെ കുഴിയിലേക്ക് എറിയുകയായിരുന്നു. ഫ്ലക്സ് സ്ഥാപിച്ചിരുന്ന തടിക്കഷ്ണം മാത്രമാണ് ഇപ്പോൾ സ്ഥലത്ത് അവശേഷിക്കുന്നത്.മുതിർന്ന പാർട്ടി പ്രവർത്തകർ സംഭവത്തിൽ വൈകാരികമായാണ് പ്രതികരിച്ചത്.
പൊളിറ്റ് ബ്യൂറോ അംഗവും സംസ്ഥാന സെക്രട്ടറിയുമായിരുന്ന നേതാവിന്റെ ഓർമദിനത്തിൽ തന്നെ സ്വന്തം വിദ്യാർത്ഥി സംഘടനയുടെ പ്രവർത്തകനിൽ നിന്ന് ഇത്തരമൊരു നടപടി ഉണ്ടായതിൽ SFI നേതൃത്വത്തിന്റെ രാഷ്‌ട്രീയ വിദ്യാഭ്യാസത്തെ കുറിച്ച് ചോദ്യങ്ങൾ ഉയരുന്നുണ്ടെന്നാണ് നാട്ടുകാർ പറയുന്നത്.
