പാലക്കാട്: തനിക്ക് ഏറ്റവും പിന്തുണ ലഭിക്കുന്നത് കേന്ദ്രസർക്കാറിൽ നിന്നാണെന്ന് ഏഷ്യൻ ഗെയിംസ് വെള്ളി മെഡൽ ജേതാവ് എം. ശ്രീശങ്കർ. കാലിലെ പരിക്ക് ചികിത്സിക്കാൻ വളരെ വേഗത്തിൽ കേന്ദ്രം 25 ലക്ഷം രൂപ അനുവദിച്ചു. എന്നാൽ കേരള സർക്കാരിന്റെ ഭാഗത്തുനിന്നുള്ള പിന്തുണ കുറവാണെന്നും മന്ത്രിമാർ ആരും തന്നെ വിളിക്കാത്തതിൽ പരിഭവമില്ല എന്നും ശ്രീശങ്കർ ജനം ടിവിയോട് പറഞ്ഞു.
കേന്ദ്രസർക്കാരിന്റെ പിന്തുണ നിർണായകം
തന്റെ പരിശീലനത്തിനും കരിയറിനുമുള്ള പ്രധാന സാമ്പത്തിക പിന്തുണ കേന്ദ്രസർക്കാരിന്റെ ടാർഗറ്റ് ഒളിമ്പിക് പോഡിയം സ്കീം (TOPS), സ്പോർട്സ് അതോറിറ്റി ഓഫ് ഇന്ത്യ (SAI), അത്ലറ്റിക്സ് ഫെഡറേഷൻ ഓഫ് ഇന്ത്യ എന്നിവയിൽ നിന്നാണ് ലഭിക്കുന്നതെന്ന് ശ്രീശങ്കർ പറഞ്ഞു. പരിക്കിന്റെ ചികിത്സയ്‌ക്കുള്ള സാമ്പത്തിക സഹായവും TOPS പദ്ധതിയിലൂടെയാണ് ലഭിക്കുന്നത്.
റിലയൻസ് ഫൗണ്ടേഷനിൽ നിന്നുള്ള സാമ്പത്തിക പിന്തുണയും മുന്നോട്ട് പോകാൻ ഊർജ്ജം നൽകുന്നു. കേരളത്തിന്റെ ഭാഗത്തുനിന്നും കൂടുതൽ സാമ്പത്തിക സഹായവും പ്രത്യേക പദ്ധതികളും ലഭിച്ചാൽ പരിശീലനവും മത്സരങ്ങളും കൂടുതൽ മികച്ച രീതിയിൽ മുന്നോട്ടുകൊണ്ടുപോകാൻ കഴിയുമെന്നും ശ്രീശങ്കർ അഭിപ്രായപ്പെട്ടു. മറ്റ് സംസ്ഥാനങ്ങളിൽ നിന്ന് മികച്ച സൗകര്യങ്ങൾ വാഗ്ദാനം ലഭിച്ചിട്ടുണ്ടെന്നും എന്നാൽ ഇതുസംബന്ധിച്ച് അന്തിമ തീരുമാനമെടുത്തിട്ടില്ലെന്നും താരം വെളിപ്പെടുത്തി.
കാലിലെ ലിഗമെന്റിന് ചെറിയ സ്പ്രെയിൻ സംഭവിച്ചതിനെത്തുടർന്ന് തുടർചികിത്സയ്‌ക്കായി വിദേശത്തേക്ക് പോകേണ്ടിവരുമെന്നും താരം വ്യക്തമാക്കി. മഴയെ തുടർന്ന് ടേക്ക് ഓഫ് ബോർഡ് നനഞ്ഞതാണ് പരിക്കിന് കാരണമായത്. ചാട്ടത്തിനിടെ ബോർഡിൽ കാൽ വഴുതുകയും കാൽ ഉള്ളിലേക്ക് തിരിയുകയുമായിരുന്നു. പ
അടുത്ത ലക്ഷ്യം ലോക ചാമ്പ്യൻഷിപ്പ്
ആദ്യം പരിക്ക് പൂർണമായി ഭേദമാക്കുകയാണ് ലക്ഷ്യം. ഡിസംബറോടെ പരിശീലനം പുനരാരംഭിക്കാനാണ് പദ്ധതിയെന്ന് ശ്രീശങ്കർ പറഞ്ഞു. അടുത്ത വർഷം നടക്കുന്ന ഏഷ്യൻ ചാമ്പ്യൻഷിപ്പും ലോക ചാമ്പ്യൻഷിപ്പും പ്രധാന ലക്ഷ്യങ്ങളാണ്. അതിനുശേഷം 2028-ലെ ഒളിമ്പിക്സിനായി തയ്യാറെടുക്കുമെന്നും താരം വ്യക്തമാക്കി.
മത്സരങ്ങളിൽ പങ്കെടുക്കുന്ന യുവതാരങ്ങളോട് സത്യസന്ധമായി പരിശ്രമിക്കണമെന്നും കുറുക്കുവഴികൾ തേടാതെ സ്കൂൾ മീറ്റുകൾ ഉൾപ്പെടെയുള്ള മത്സരങ്ങൾ ആസ്വദിച്ച് മുന്നോട്ടുപോകണമെന്നും ശ്രീശങ്കർ നിർദേശിച്ചു.
