തിരുവനന്തപുരം: കിഫ്ബിയുമായി ബന്ധപ്പെട്ട അഴിമതി ആരോപണങ്ങളില്‍ മുഖ്യമന്ത്രി പിണറായി വിജയന്‍ രാജിവെക്കണമെന്ന് ആവശ്യപ്പെട്ട് യുവമോര്‍ച്ചയുടെ നേതൃത്വത്തില്‍ നിയമസഭയിലേക്ക് നടത്തിയ പ്രതിഷേധ മാര്‍ച്ചില്‍ സംഘര്‍ഷം. പോലീസ് ഗ്രനേഡ് പ്രയോഗിക്കുകയും ജലപീരങ്കിയും കണ്ണീര്‍വാതകവും ഉപയോഗിക്കുകയും ചെയ്തതായി ബിജെപി നേതാക്കള്‍ പറഞ്ഞു. നിരവധി പ്രവര്‍ത്തകര്‍ക്ക് പരിക്കേറ്റതായും ഗുരുതരമായി പരിക്കേറ്റവരെ ആശുപത്രിയില്‍ പ്രവേശിപ്പിച്ചതായും നേതാക്കള്‍ അറിയിച്ചു. മാര്‍ച്ച് ഉദ്ഘാടനം ചെയ്ത് സംസാരിച്ച ബിജെപി നിയമസഭാ കക്ഷി നേതാവ് ബി.ബി. ഗോപകുമാര്‍ എംഎല്‍എ, സമാധാനപരമായി പ്രതിഷേധിച്ച യുവമോര്‍ച്ച പ്രവര്‍ത്തകര്‍ക്കെതിരെ പോലീസ് ബലപ്രയോഗം നടത്തിയെന്ന് ആരോപിച്ചു.
ഡല്‍ഹി പോലീസിന്റെ നടപടികളെ വിമര്‍ശിക്കുന്ന കോണ്‍ഗ്രസ് കേരളത്തില്‍ സ്വന്തം പോലീസിന്റെ നടപടികള്‍ക്ക് മറുപടി പറയണമെന്നും അദ്ദേഹം ആവശ്യപ്പെട്ടു. കിഫ്ബിയിലെ ക്രമക്കേടുകള്‍ മൂലം സംസ്ഥാനത്തിന് 70,000 കോടി രൂപയുടെ സാമ്പത്തിക നഷ്ടമുണ്ടായെന്ന ഗുരുതരമായ ആരോപണമാണ് ഉയര്‍ന്നിരിക്കുന്നതെന്ന് ഗോപകുമാര്‍ പറഞ്ഞു. ഈ വിഷയത്തില്‍ പിണറായി വിജയനെതിരെ പ്രതിപക്ഷ നേതാവ് വി.ഡി. സതീശന്‍ സ്വീകരിക്കുന്ന നിയമനടപടികള്‍ എന്താണെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.
എക്‌സാലോജിക്കുമായി ബന്ധപ്പെട്ട ഇടപാടുകള്‍ക്കു പിന്നാലെ കിഫ്ബിയുമായി ബന്ധപ്പെട്ട് കൂടുതല്‍ ഗുരുതരമായ ക്രമക്കേടുകള്‍ പുറത്തുവരുന്നുവെന്നാണ് ബിജെപിയുടെ ആരോപണം. ഇത്രയും വലിയ സാമ്പത്തിക നഷ്ടമുണ്ടായെന്ന ആരോപണത്തില്‍ സര്‍ക്കാര്‍ എന്തുകൊണ്ട് ശക്തമായ നടപടി സ്വീകരിക്കുന്നില്ലെന്നും ഗോപകുമാര്‍ ചോദിച്ചു. കണ്ണൂരില്‍ ഏകദേശം 2,500 കോടി രൂപ ചെലവിട്ട് ആയിരം ഏക്കറോളം ഭൂമി ഏറ്റെടുത്തിട്ടും അത് ഫലപ്രദമായി ഉപയോഗിച്ചിട്ടില്ലെന്ന് ഗോപകുമാര്‍ ആരോപിച്ചു. വികസന പ്രവര്‍ത്തനങ്ങള്‍ക്ക് ഭൂമി ലഭിക്കുന്നില്ലെന്ന് പറയുന്ന എല്‍ഡിഎഫും യുഡിഎഫും കോടികള്‍ ചെലവഴിച്ച് ഏറ്റെടുത്ത ഭൂമി ഉപയോഗശൂന്യമായി കിടക്കുന്നതിന് മറുപടി നല്‍കണമെന്നും അദ്ദേഹം ആവശ്യപ്പെട്ടു.
ഭൂമി ഇടപാടുകളില്‍ എക്‌സാലോജിക്കിന് സമാനമായ ഇടപെടലുകള്‍ ഉണ്ടായിട്ടുണ്ടോയെന്നും വീണാ വിജയന്റെയോ മന്ത്രി പി.എ. മുഹമ്മദ് റിയാസിന്റെയോ ഇടപെടലുകള്‍ ഉണ്ടായിരുന്നോയെന്നും അന്വേഷിക്കണമെന്ന് ഗോപകുമാര്‍ ആവശ്യപ്പെട്ടു. ഇടപാടുകളിലൂടെ ലഭിച്ച തുക വിദേശത്തേക്ക് കടത്തിയിട്ടുണ്ടോയെന്ന ചോദ്യവും അദ്ദേഹം ഉന്നയിച്ചു. ഈ ആരോപണങ്ങളില്‍ പിണറായി വിജയനും വി.ഡി. സതീശനും മറുപടി പറയണമെന്നാണ് ബിജെപിയുടെ ആവശ്യം. കേരളത്തിന്റെ പൊതുഖജനാവുമായി ബന്ധപ്പെട്ട അഴിമതിയുടെ കാര്യത്തില്‍ എല്‍ഡിഎഫും യുഡിഎഫും പരസ്പരം സംരക്ഷിക്കുകയാണെന്ന് ഗോപകുമാര്‍ ആരോപിച്ചു. അഴിമതിക്കെതിരെ നിയമസഭയില്‍ ബിജെപി ശബ്ദമുയര്‍ത്തുമ്പോള്‍ സംസാരിക്കാന്‍ അവസരം നിഷേധിക്കുന്നുവെന്നും അദ്ദേഹം പറഞ്ഞു.
പിണറായി വിജയനെതിരായ ആരോപണങ്ങളില്‍ എഫ്ഐആര്‍ രജിസ്റ്റര്‍ ചെയ്യുന്നതുമായി ബന്ധപ്പെട്ട ഹൈക്കോടതി നടപടികളിലും വി.ഡി. സതീശന്റെ നിലപാട് സംശയകരമാണെന്ന് ഗോപകുമാര്‍ ആരോപിച്ചു. പ്രധാനമന്ത്രി നരേന്ദ്ര മോദിയുടെ സര്‍ക്കാരിനെ വിമര്‍ശിക്കുന്നതിനപ്പുറം കേരള നിയമസഭയില്‍ ഇരുവിഭാഗങ്ങള്‍ക്കും മറ്റൊരു അജണ്ടയില്ലെന്നും അദ്ദേഹം കുറ്റപ്പെടുത്തി. പിണറായി വിജയനെതിരായ പ്രതിഷേധങ്ങളെ പോലീസ് ബലപ്രയോഗത്തിലൂടെ അടിച്ചമര്‍ത്താനാണ് സര്‍ക്കാര്‍ ശ്രമിക്കുന്നതെങ്കില്‍ അത് പൊതുജനങ്ങള്‍ക്കു മുന്നിലും കോടതിയിലും തുറന്നുകാട്ടുമെന്ന് ബിജെപി സംസ്ഥാന ജനറല്‍ സെക്രട്ടറി അഡ്വ. എസ്. സുരേഷ് പറഞ്ഞു. ഗ്രനേഡ് പ്രയോഗിച്ചും ലാത്തിച്ചാര്‍ജ് നടത്തിയും സമരത്തെ തടയാനാകില്ലെന്നും അദ്ദേഹം വ്യക്തമാക്കി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പിണറായി വിജയന്‍ രാജിവെക്കുന്നതുവരെ സമരം തുടരുമെന്നും കിഫ്ബിയുമായി ബന്ധപ്പെട്ട ആരോപണങ്ങളില്‍ ഉത്തരവാദികള്‍ക്കെതിരെ നടപടി ഉണ്ടാകുന്നതുവരെ ശക്തമായ നിയമപരവും ജനകീയവുമായ പോരാട്ടം തുടരുമെന്നും ബിജെപി നേതാക്കള്‍ അറിയിച്ചു. ബിജെപി സംസ്ഥാന ഉപാധ്യക്ഷന്‍ അഡ്വ. പി. സുധീര്‍, സംസ്ഥാന സെക്രട്ടറി പൂന്തുറ ശ്രീകുമാര്‍, യുവമോര്‍ച്ച സംസ്ഥാന അധ്യക്ഷന്‍ മനു പ്രസാദ്, സംസ്ഥാന ജനറല്‍ സെക്രട്ടറിമാരായ വിഷ്ണു വഞ്ചിമല, ഗോകുല്‍ ഗോപിനാഥ് എന്നിവരടക്കം സംസ്ഥാന-ജില്ലാ നേതാക്കളും നൂറുകണക്കിന് പ്രവര്‍ത്തകരും മാര്‍ച്ചില്‍ പങ്കെടുത്തു.
