മുംബൈ: ഇന്ത്യയും യുഎഇയും തമ്മിലുള്ള നയതന്ത്ര-സാമ്പത്തിക സഹകരണം കൂടുതല്‍ ശക്തമാക്കുന്നതിനായി ഇന്ത്യന്‍ വിദേശകാര്യ മന്ത്രി എസ്. ജയ്ശങ്കറും യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിന്‍ സായിദ് അല്‍ നഹ്യാനും മുംബൈയില്‍ കൂടിക്കാഴ്ച നടത്തി. ഇരുരാജ്യങ്ങളും തമ്മിലുള്ള വ്യാപാര-നിക്ഷേപ ബന്ധങ്ങളും ഭാവിയിലെ സഹകരണ സാധ്യതകളും ചര്‍ച്ചയില്‍ പ്രധാന വിഷയങ്ങളായി. സമഗ്ര സാമ്പത്തിക പങ്കാളിത്ത കരാറിന്റെ പുരോഗതിയും തുടര്‍ പദ്ധതികളും ഇരു നേതാക്കളും വിലയിരുത്തി.
സാമ്പത്തിക രംഗത്തെ സഹകരണത്തിനു പുറമെ ഉഭയകക്ഷി വ്യാപാരം, നിക്ഷേപം, വിദ്യാഭ്യാസം, സംസ്‌കാരം, പൈതൃകം തുടങ്ങിയ മേഖലകളില്‍ പങ്കാളിത്തം വിപുലീകരിക്കുന്നതിനെക്കുറിച്ചും ചര്‍ച്ച നടന്നു. അമേരിക്കയ്‌ക്കും ചൈനയ്‌ക്കും പിന്നാലെ ഇന്ത്യയുടെ മൂന്നാമത്തെ വലിയ വ്യാപാര പങ്കാളിയാണ് യുഎഇ എന്നതില്‍ സന്തോഷമുണ്ടെന്ന് ഷെയ്ഖ് അബ്ദുള്ള വ്യക്തമാക്കി. ഇന്ത്യയുമായുള്ള ബന്ധം കൂടുതല്‍ ആഴത്തിലുള്ളതും ശക്തവുമാക്കാന്‍ യുഎഇ പ്രതിജ്ഞാബദ്ധമാണെന്നും അദ്ദേഹം അറിയിച്ചു. വരാനിരിക്കുന്ന ഐക്യരാഷ്‌ട്രസഭയുടെ വാട്ടര്‍ കോണ്‍ഫറന്‍സില്‍ ഇരുരാജ്യങ്ങളുടെയും പങ്കാളിത്തവും ചര്‍ച്ചയായി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
പ്രാദേശിക, അന്തര്‍ദേശീയ വിഷയങ്ങളും കൂടിക്കാഴ്ചയില്‍ ഇരുനേതാക്കളും വിലയിരുത്തി. തന്ത്രപ്രധാനമായ മേഖലകളില്‍ സഹകരണം കൂടുതല്‍ വിപുലീകരിക്കാനുള്ള ഇന്ത്യയുടെയും യുഎഇയുടെയും ശ്രമങ്ങള്‍ക്ക് കൂടിക്കാഴ്ച പ്രാധാന്യമേകുന്നു.
