അയോധ്യ: സരയൂ നദിയില്‍ ദുര്‍ഗാവിഗ്രഹ നിമജ്ജനം കഴിഞ്ഞ് മടങ്ങുകയായിരുന്ന തീര്‍ഥാടക സംഘം സഞ്ചരിച്ച ട്രാക്ടര്‍ ട്രോളിയില്‍ ട്രക്കിടിച്ച് രണ്ട് യുവാക്കള്‍ മരിച്ചു. അപകടത്തില്‍ ഒന്‍പത് പേര്‍ക്ക് ഗുരുതരമായി പരുക്കേറ്റു. ഗോണ്ട-അയോധ്യ ഹൈവേയില്‍ വസീര്‍ഗഞ്ച് പൊലീസ് സ്റ്റേഷന്‍ പരിധിയിലെ രാജാസാഗ്രയിലായിരുന്നു അപകടം. ചൊവ്വാഴ്ച രാത്രി സരയൂ തീരത്തുനിന്ന് മടങ്ങുകയായിരുന്ന തീര്‍ഥാടകരുടെ ട്രാക്ടര്‍ ട്രോളിയിലേക്ക് എതിര്‍ദിശയില്‍ എത്തിയ ട്രക്ക് ഇടിച്ചുകയറുകയായിരുന്നു. ഇടിയുടെ ആഘാതത്തില്‍ ട്രോളിയിലുണ്ടായിരുന്നവര്‍ റോഡിലേക്ക് തെറിച്ചുവീണു. ഗോണ്ട ജില്ലയിലെ മോത്തിഗഞ്ച് പൊലീസ് സ്റ്റേഷന്‍ പരിധിയിലുള്ള ഗോവിന്ദ്പര ഗ്രാമവാസികളായിരുന്നു സംഘത്തിലുണ്ടായിരുന്നത്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ശബ്ദം കേട്ട് ഓടിയെത്തിയ നാട്ടുകാരും പൊലീസും ചേര്‍ന്നാണ് പരുക്കേറ്റവരെ സമീപത്തെ മെഡിക്കല്‍ കോളജ് ആശുപത്രിയില്‍ എത്തിച്ചത്. ചികിത്സയ്‌ക്കിടെ സഞ്ജയ് (20), ആഷിഷ് (19) എന്നീ യുവാക്കള്‍ മരിച്ചതായി അധികൃതര്‍ അറിയിച്ചു. ഗുരുതരാവസ്ഥയിലായിരുന്ന ഒരാള്‍ അപകടനില തരണം ചെയ്തതായി ബുധനാഴ്ച രാവിലെ ഡോക്ടര്‍മാര്‍ വ്യക്തമാക്കി. കൂലിപ്പണി ചെയ്ത് കുടുംബം പോറ്റിയിരുന്ന യുവാക്കളാണ് അപകടത്തില്‍ മരിച്ചതെന്ന് ഗോവിന്ദ്പരയില്‍നിന്ന് ആശുപത്രിയിലെത്തിയ ബന്ധുക്കള്‍ പറഞ്ഞു. അപകടത്തെ തുടര്‍ന്ന് പ്രദേശത്ത് ദുഃഖം പടര്‍ന്നു.
