കൊച്ചി: അടിയന്തരാവസ്ഥയ്ക്കെതിരായ പോരാട്ടത്തിൽ സജീവ സാന്നിധ്യമായിരുന്ന ആലുവ തോട്ടയ്ക്കാട്ടുകര കുഴിക്കാട്ടിൽ ‘ശ്രുതി’യിൽ സീതാലക്ഷ്മി അമ്മ (89) അന്തരിച്ചു. ഭാരതീയ ജനസംഘത്തിന്റെ പ്രവർത്തനങ്ങളിലും രാഷ്ട്രീയ സ്വയംസേവക സംഘത്തിന്റെ വിവിധ പ്രവർത്തനങ്ങളിലും സജീവമായിരുന്ന സീതാലക്ഷ്മി അമ്മയുടെ വിയോഗം സംഘപ്രസ്ഥാനത്തിന് തീരാനഷ്ടമാണ്.
അടിയന്തരാവസ്ഥക്കാലത്ത് ഭരണകൂടത്തിനെതിരെ നടന്ന വിവിധ സമരങ്ങളിൽ മുൻനിരയിൽ നിന്ന പോരാളിയായിരുന്നു സീതച്ചേച്ചി. ഏലൂരിലെ ഫാക്ട് കമ്പനിപ്പടിയിൽ അടിയന്തരാവസ്ഥയ്ക്കെതിരെ നടന്ന സമരത്തിൽ പങ്കെടുത്ത അവർക്ക് പോലീസിന്റെ ക്രൂരമർദ്ദനമേറ്റു. എന്നാൽ അതൊന്നും പോരാട്ടവീര്യം കെടുത്തിയില്ല. പിന്നീട് ആലുവയിൽ ഭാരതീയ ജനസംഘത്തിന്റെ വനിതാവിഭാഗമായ ഭാരതീയ മഹിളാ സംഘിന്റെ സംസ്ഥാന പ്രസിഡന്റായിരുന്ന ടി.പി. വിനോദിനി അമ്മയ്ക്കൊപ്പം സമരരംഗത്തിറങ്ങി. ഇതിന്റെ പേരിൽ ഒരുമാസക്കാലം ജയിൽവാസവും അനുഭവിച്ചു.
ജനസംഘത്തിന്റെ പ്രവർത്തനങ്ങളുടെ ഭാഗമായി ഡൽഹിയിലും മറ്റ് വിവിധ കേന്ദ്രങ്ങളിലും നടന്ന സമരപരിപാടികളിലും പങ്കെടുത്തു. സർസംഘചാലക് ആയിരുന്ന പൂജനീയ ദേവറസ് ഒരിക്കൽ സീതാലക്ഷ്മി അമ്മയുടെ കുടുംബത്തിൽ താമസിച്ചിട്ടുമുണ്ട്.
രാഷ്ട്രീയ സ്വയംസേവക സംഘത്തിന്റെ സജീവ പ്രവർത്തകനും 1948-ലെ സംഘനിരോധന കാലത്ത് പ്രതിഷേധങ്ങളിൽ പങ്കെടുത്ത് പോലീസ് മർദ്ദനമേറ്റയാളുമായിരുന്ന ഗോപാലകൃഷ്ണപിള്ളയുടെ ഭാര്യയാണ് സീതാലക്ഷ്മി അമ്മ. മകൾ ശാന്തകുമാരിയുടെ ഭർത്താവ് കെ.എൻ. മേനോൻ ഫാക്ടിലെ ഉദ്യോഗസ്ഥനായിരുന്നു. കുട്ടിക്കാലം മുതൽ സംഘപ്രവർത്തനങ്ങളിൽ സജീവമായിരുന്ന അദ്ദേഹം പിന്നീട് സംഘത്തിന്റെ സംസ്ഥാന സേവാപ്രമുഖ് ചുമതലയും വഹിച്ചു. കെ.എൻ. മേനോൻ അകാലത്തിൽ അന്തരിച്ചു. ഏകമകൻ വേണുഗോപാലും ഏതാനും വർഷങ്ങൾക്ക് മുമ്പ് മരണപ്പെട്ടിരുന്നു.















