ന്യൂഡല്ഹി: രാജ്യതലസ്ഥാനത്ത് നടന്ന റിപ്പബ്ലിക് ദിനാഘോഷങ്ങള്ക്ക് പിന്നാലെ രാജ്യത്ത് ഉടനീളം വിവിധയിടങ്ങളില് ആഘോഷങ്ങള് നടന്നു. എല്ലാ സംസ്ഥാന തലസ്ഥാനത്തും പ്രമുഖ കേന്ദ്രങ്ങളിലും വിവിധ സംഘടനകളുടെ ആഭിമുഖ്യത്തിലും റിപ്പബ്ലിക് ദിനത്തോട് അനുബന്ധിച്ച് വിപുലമായ ആഘോഷങ്ങളാണ് ഒരുക്കിയിരുന്നത്. തിരുവനന്തപുരത്ത് ഗവര്ണ്ണര് ജസ്റ്റിസ് പി. സദാശിവം പതാക ഉയര്ത്തി.
നിയമനിര്മ്മാണ സഭകള് സാധാരണക്കാരന്റെ പ്രതീക്ഷകള്ക്കൊത്ത് ഉയരണമെന്ന് റിപ്പബ്ലിക് ദിന സന്ദേശത്തില് ഗവര്ണര് ആവശ്യപ്പെട്ടു. കൊച്ചിയില് കാക്കനാട് പോലീസ് പരേഡ് ഗ്രൗണ്ടില് നടന്ന ചടങ്ങില്, പൊതുമരാമത്ത് വകുപ്പ് മന്ത്രി വി. കെ ഇബ്രാഹിം കുഞ്ഞ് പതാക ഉയര്ത്തി.
പാലക്കാട് കോട്ടമൈതാനിയില് നടന്ന ചടങ്ങില് ഡെപ്യൂട്ടി സ്പീക്കര് പാലോട് രവി, കണ്ണൂര് പോലീസ് ഗ്രൗണ്ടില് നടന്ന ചടങ്ങില് മന്ത്രി കെ.പി മോഹനന്, മലപ്പുറം എംഎസ് പി മൈതാനത്ത് മന്ത്രി ആര്യാടന് മുഹമ്മദ്, വയനാട് കല്പറ്റ എസ്കെഎംകെജെ ഗ്രൗണ്ടില് മന്ത്രി പി.കെ ജയലക്ഷമി, കാസര്ഗോഡ് മുന്സിപ്പല് സ്റ്റേഡിയത്തില് മന്ത്രി അനൂപ് ജേക്കബ്, കൊല്ലത്ത് മന്ത്രി ഷിബു ബേബി ജോണ്, കോട്ടയത്ത് മന്ത്രി തിരുവഞ്ചൂര് രാധാകൃഷ്ണന്, തൃശ്ശൂരില് മന്ത്രി കെ.സി ജോസഫ് , പത്തനംതിട്ടയില് മന്ത്രി അടൂര് പ്രകാശ്, ആലപ്പുഴയില് മന്ത്രി രമേശ് ചെന്നിത്തല, ഇടുക്കിയില് മന്ത്രി പി.ജെ ജോസഫ് തുടങ്ങിയവര് പതാക ഉയര്ത്തി പരേഡില് അഭിവാദ്യം സ്വീകരിച്ചു.
ഡല്ഹിയിലെ ബിജെപി ആസ്ഥാനത്ത് ബിജെപി ദേശീയ അദ്ധ്യക്ഷന് അമിത് ഷാ പതാക ഉയര്ത്തി. കേന്ദ്ര ആഭ്യന്തരമന്ത്രി രാജ്നാഥ് സിംഗ് സ്വവസതിയില് പതാക ഉയര്ത്തിയ ശേഷമാണ് മറ്റ് ഔദ്യോഗിക ആഘോഷങ്ങളില് പങ്കെടുത്തത്. നാഗ്പൂരിലെ ആര്.എസ്.എസ് ആസ്ഥാനത്ത് ആര്എസ്എസ് സര് സംഘചാലക് മോഹന്ഭഗവത് ദേശീയപതാക ഉയര്ത്തി.
മധ്യപ്രദേശിലെ രത്ലമില് നടന്ന റിപ്പബ്ലിക് ദിന പരേഡില് മുഖ്യമന്ത്രി ശിവരാജ് സിങ് ചൗഹാന് പതാക ഉയര്ത്തി സല്യൂട്ട് സ്വീകരിച്ചു. ബംഗലൂരുവില് നടന്ന സംസ്ഥാന സര്ക്കാറിന്റെ ഔദ്യോഗിക ചടങ്ങില് ഗവര്ണര് വാജുഭായി വാല പതാക ഉയര്ത്തി.