തിരുവനന്തപുരം: തനിക്ക് കോഴ നല്‍കിയെന്ന സോളാര്‍ തട്ടിപ്പ് കേസ് പ്രതി സരിത നായരുടെ ആരോപണം അടിസ്ഥാനരഹിതമാണെന്ന് മുഖ്യമന്ത്രി ഉമ്മന്‍ചാണ്ടി. ദുരിതാശ്വാസ നിധിയിലേക്ക് സരിത നല്‍കിയ ചെക്ക് പോലും പണമില്ലാതെ മടങ്ങിയ സാഹചര്യത്തില്‍ തനിക്ക് എങ്ങനെയാണ് കോഴ നല്‍കുന്നതെന്ന് മുഖ്യമന്ത്രി ചോദിച്ചു. മന്ത്രിസഭായോഗ തീരുമാനങ്ങള്‍ വിശദീകരിക്കാനെത്തിയ മുഖ്യമന്ത്രി ആരോപണങ്ങളോട് പ്രതികരിക്കുകയായിരുന്നു.
ഇതിന് മുന്‍പ് സോളാര്‍ കമ്മീഷനിലും കോടതിയിലുമായി എത്രയോ അവസരങ്ങള്‍ സരിതയ്ക്ക് കിട്ടിയെന്നും അന്നൊന്നും പറയാത്ത കാര്യമാണിതെന്നും മുഖ്യമന്ത്രി ചൂണ്ടിക്കാട്ടി. തനിക്ക് പണം തന്നുവെങ്കില്‍ അതിന് എന്ത് പ്രയോജനമാണ് അവര്‍ക്ക് ഉണ്ടായതെന്നും മുഖ്യമന്ത്രി ചോദിച്ചു. തന്റെ ലെറ്റര്‍പാഡ് പോലും അവര്‍ക്ക് കിട്ടിയില്ല. അതും കൃത്രിമമായി ഉണ്ടാക്കുകയായിരുന്നുവെന്ന് മുഖ്യമന്ത്രി ചൂണ്ടിക്കാട്ടി.
തന്നെ സമീപിച്ചുവെന്ന് ആരോപണം ഉന്നയിക്കുന്നത് ശ്രീധരന്‍ നായര്‍ മാത്രമാണ്. തട്ടിപ്പിന് ഇരയായ മാത്യുവെന്ന ആള്‍ പറയുന്നത് പണം നഷ്ടപ്പെട്ട ശേഷം അത് തിരികെ വാങ്ങി നല്‍കാന്‍ തന്നെ സമീപിച്ചുവെന്നാണെന്നും മുഖ്യമന്ത്രി ഓര്‍മ്മിപ്പിച്ചു. കേസ് അട്ടിമറിക്കാന്‍ മറ്റ് പലരും സരിതയ്ക്ക് പണം കൊടുത്തുവെന്നായിരുന്നു ആദ്യം പറഞ്ഞത്. ഓരോ സമയത്തും ഓരോന്ന് മാറ്റിപ്പറയുകയാണ്. ഏത് സാഹചര്യത്തിലാണ് സരിത ആരോപണം ഉന്നയിച്ചതെന്ന് തനിക്ക് അറിയില്ലെന്നും മുഖ്യമന്ത്രി പറഞ്ഞു.
രാജിവെയ്ക്കണമെന്ന പ്രതിപക്ഷ ആവശ്യം ചൂണ്ടിക്കാട്ടിയപ്പോള്‍ നിയമത്തെ മാനിക്കുന്ന ആളാണ് താനെന്നും സത്യമറിയാന്‍ വേണ്ടിയാണ് കമ്മീഷനെ വെച്ചതെന്നുമായിരുന്നു മുഖ്യമന്ത്രിയുടെ മറുപടി.
