തൃശ്ശൂര്: സോളാര് കേസില് മുഖ്യമന്ത്രി ഉമ്മന്ചാണ്ടി അടക്കമുള്ള നേതാക്കള്ക്കെതിരേ തൃശൂര് വിജിലന്സ് കോടതിയില് ഹര്ജി നല്കിയ പൊതുപ്രവര്ത്തകന് പി.ഡി ജോസഫിന്റെ വീടിന് നേരെ അക്രമം. ഇന്നലെ രാത്രി 2.30 ഓടെ ബൈക്കിലെത്തിയ സംഘം വീടിന് നേരെ കല്ലെറിയുകയും വീടിന് മുന്നിലുണ്ടായിരുന്ന ചവിട്ടുമെത്ത കത്തിക്കുകയും ചെയ്തു.
ബഹളം കേട്ട് വീട്ടുകാര് ഉണര്ന്ന് ലൈറ്റിട്ടതോടെ സംഘം രക്ഷപെടുകയായിരുന്നു. കല്ലേറില് വീടിന്റെ ഓടുകള് പൊട്ടിയിട്ടുണ്ട്. വിയ്യൂര് പൊലീസ് അന്വേഷണം ആരംഭിച്ചു.
സോളാര് കമ്മീഷനില് സരിത നല്കിയ മൊഴിയുടെയും കെ. ബാബുവിന് കൈക്കൂലി നല്കിയെന്ന ബിജു രമേശിന്റെയും മൊഴികളുടെയും അടിസ്ഥാനത്തില് പി.ഡി ജോസഫ് നല്കിയ ഹര്ജിയിലാണ് മുഖ്യമന്ത്രി ഉമ്മന്ചാണ്ടിക്കും കെ. ബാബുവിനും ആര്യാടന് മുഹമ്മദിനുമെതിരേ കേസെടുക്കാന് തൃശൂര് വിജിലന്സ് കോടതി ഉത്തരവിട്ടത്.
കോടതിയുടെ നടപടി മന്ത്രിസഭയുടെ നിലനില്പ് തന്നെ പ്രതിസന്ധിയിലാക്കിയിരിക്കുകയാണ്. സംഭവം സംസ്ഥാനത്ത് വലിയ രാഷ്ട്രീയ വിവാദമായി മാറിക്കൊണ്ടിരിക്കെയാണ് പരാതിക്കാരന്റെ വീടിന് നേരെ അക്രമം ഉണ്ടായത്.
