ചെന്നൈ: തമിഴ്നാട്ടില് വീണ്ടും കോണ്ഗ്രസ് ഡിഎംകെ സഖ്യം. ചെന്നൈയില് ഡിഎംകെ നേതാവ് എം. കരുണാനിധിയുമായി കൂടിക്കാഴ്ച നടത്തിയ ശേഷം മുതിര്ന്ന കോണ്ഗ്രസ് നേതാവ് ഗുലാം നബി ആസാദാണ് ഇക്കാര്യം അറിയിച്ചത്. ടുജി കേസില് കരുണാനിധിയുടെ മകള് കനിമൊഴി ഉള്പ്പെടെയുളള ഡിഎംകെ നേതാക്കള്ക്കെതിരായ സിബിഐ നടപടിയുടെ പേരില് മൂന്ന് വര്ഷം മുന്പ് വേര്പിരിഞ്ഞ സഖ്യമാണ് നിയമസഭാ തെരഞ്ഞെടുപ്പ് മുന്നിര്ത്തി വീണ്ടും കൂട്ടിയിണക്കപ്പെട്ടത്.
സഖ്യത്തിന് ധാരണയായതായി ഡിഎംകെ നേതാവ് എം.കെ സ്റ്റാലിനും സ്ഥിരീകരിച്ചു. നിയമസഭാ തെരഞ്ഞെടുപ്പിലെ സീറ്റ് വിഭജനം ഉള്പ്പെടെയുള്ള കാര്യങ്ങളില് പിന്നീട് ധാരണയാകുമെന്നും സ്റ്റാലിന് വ്യക്തമാക്കി. കോണ്ഗ്രസ് സംസ്ഥാന അദ്ധ്യക്ഷന് ഇവികെഎസ് ഇളങ്കോവന്, പാര്ട്ടി തമിഴ്നാട് ഘടകത്തിന്റെ ചുമതലയുളള മുകുള് വാസ്നിക് എന്നിവരും ഗുലാം നബി ആസാദിനൊപ്പം ഉണ്ടായിരുന്നു.
സ്റ്റാലിന്റെയും കനിമൊഴിയുടെയും സാന്നിദ്ധ്യത്തിലായിരുന്നു ഒരു മണിക്കൂറോളം നീണ്ടു നിന്ന ചര്ച്ച. തമിഴ്നാട്ടില് എഐഎഡിഎംകെയുടെ വര്ധിച്ചുവരുന്ന സ്വാധീനം പരിഗണിച്ചാണ് വീണ്ടും കോണ്ഗ്രസുമായി സഖ്യത്തിലേര്പ്പെടാന് ഡിഎംകെ മുതിര്ന്നത്. അനധികൃത സ്വത്ത് സമ്പാദനക്കേസില് കുറ്റക്കാരിയായി കണ്ടെത്തുകയും ജയില്വാസം അനുഭവിക്കുകയും ചെയ്തെങ്കിലും ജയലളിതയ്ക്കെതിരേ കാര്യമായ ചലനമുണ്ടാക്കാന് ഡിഎംകെയ്ക്ക് കഴിഞ്ഞിരുന്നില്ല.
കഴിഞ്ഞ ലോക്സഭാ തെരഞ്ഞെടുപ്പില് കോണ്ഗ്രസും ഡിഎംകെയും വെവ്വേറെയാണ് മത്സരിച്ചത്. തെരഞ്ഞെടുപ്പില് കാര്യമായ നേട്ടമുണ്ടാക്കാന് ഇരുകൂട്ടര്ക്കും കഴിഞ്ഞിരുന്നില്ല. 39 സീറ്റുകളില് 37 എണ്ണത്തിലും എഐഎഡിഎംകെയാണ് വിജയിച്ചത്. മാത്രമല്ല എഐഎഡിഎംകെയുടെ വോട്ട് ശതമാനം ഉയരുകയും ചെയ്തിരുന്നു.
പ്രായാധിക്യം മൂലം കരുണാനിധിക്ക് പഴയതുപോലെ പ്രത്യക്ഷമായ രാഷ്ട്രീയ ഇടപെടലുകള് നടത്താനും സാധിക്കുന്നില്ല. അഴഗിരിയും സ്റ്റാലിനും തമ്മിലുള്ള പോര് വര്ധിച്ചതും പാര്ട്ടിയുടെ പ്രഭാവം കെടുത്തി. ഈ സാഹചര്യത്തിലാണ് കോണ്ഗ്രസുമായി വീണ്ടും കൈകോര്ക്കാന് ഡിഎംകെ തുനിഞ്ഞത്. 2011 ലെ നിയമസഭാ തെരഞ്ഞെടുപ്പില് സംസ്ഥാനത്ത് കോണ്ഗ്രസ് 9.3 ശതമാനം വോട്ട് നേടിയെങ്കില് കഴിഞ്ഞ ലോക്സഭാ തെരഞ്ഞെടുപ്പില് ഇത് 4.3 ശതമാനമായി കുറഞ്ഞിരുന്നു. അഞ്ച് പതിറ്റാണ്ടോളമായി അധികാരം കിട്ടാക്കനിയായ തമിഴ്നാട്ടില് പാര്ട്ടിയുടെ അടിവേര് ഇളകുന്നത് കോണ്ഗ്രസിനെയും സഖ്യത്തിലേര്പ്പെടാന് നിര്ബന്ധിതരാക്കി.
2011 ല് 234 സീറ്റുകളില് 63 എണ്ണമായിരുന്നു കോണ്ഗ്രസിന് ഡിഎംകെ നല്കിയത്. എന്നാല് ഇക്കുറി കൂടുതല് സീറ്റുകള് ചോദിക്കുമെന്ന സൂചനകള് കോണ്ഗ്രസ് ഇതിനോടകം നല്കിക്കഴിഞ്ഞു.
