ലോസ് ആഞ്ചലസ്: എണ്പത്തിയെട്ടാമത് ഓസ്കര് പുരസ്കാരങ്ങള് പ്രഖ്യാപിച്ചു. ലോസ് ആഞ്ചലസിലെ ഡോള്ബി തീയറ്ററില് നടന്ന ചടങ്ങില് തിളങ്ങിയത് മാഡ് മാക്സ് ഫ്യൂറി റോഡും ദി റെവനെന്റും ആയിരുന്നു. പൊള്ളുന്ന വിഷയം പ്രതിവാദിച്ച ടോം മക്കാര്ത്തിയുടെ സ്പേട്ട് ലൈറ്റ് ആണ് മികച്ച ചിത്രത്തിനുള്ള ഓസ്കര് സ്വന്തമാക്കിയത്.
കഴിഞ്ഞ വര്ഷം മികച്ച ചിത്രത്തിനും സംവിധായകനുമുള്ള ഓസ്കര് നേടിയ ഇനാരിറ്റു ഇത്തവണ ദി റെവനെന്റിലൂടെ മികച്ച സംവിധായകനുള്ള അംഗീകാരം നേടി. പ്രേക്ഷകന് ദ്യശ്യവിസ്മയം സമ്മാനിച്ച റെവനെന്റിലൂടെ ഡി കാപ്രിയോ മികച്ച നടനുളള പുരസ്കാരം നേടി. റൂമിലെ കരുത്തുറ്റ പ്രകടനത്തിനുളള അംഗീകാരമായി ബ്രീ ലാര്സന് മികച്ച നടിക്കുളള പുരസ്കാരവും സ്വന്തമാക്കി. ദി ഡാനിഷ് ഗേളിലൂടെ അലീഷ്യ വികാന്ഡര് മികച്ച സഹനടിക്കുളള പുരസ്കാരം നേടിയപ്പോള് മികച്ച സഹനടനുള്ള പുരസ്കാരം മാര്ക്ക് റൈലന്സ് നേടി.
ദി റെവനെന്റിലൂടെ ഛായാഗ്രഹണത്തിനുള്ള ഓസ്കര് ഇമാനുവല് ലുബസ്ക്കി സ്വന്തമാക്കി. മികച്ച എഡിറ്റിങ്, ശബ്ദലേഖനം,വസ്ത്രാലങ്കാരം, അടക്കം 6 അവാര്ഡുകള് മാഡ് മാക്സ് ഫ്യൂറി റോഡ് വാരിക്കൂട്ടി. മികച്ച ഗാനത്തിനുളള ഓസ്കര് സാം സ്മിത്ത് നേടിയപ്പോള് മികച്ച ഡോക്ടുമെന്ററി ഫീച്ചര് വിഭാഗത്തില് ഇന്ത്യന് വംശജനായ ആസിഫ് കപാഡിയ സംവിധാനം ചെയ്ത ഏമിയാണ് പുരസ്കാരം നേടിയത്. മികച്ച വിദേശ ചിത്രത്തിനുളള പുരസ്കാരം ഹംഗേറിയന് ചിത്രം സണ് ഓഫ് സോള് ആണ് നേടിയത്.
ഗോള്ഡന് ഗ്ലോബിലെ മികവ് ഒസ്കര് വേദിയിലും റെവനെന്റ് ആവര്ത്തിക്കുമെന്ന് പ്രതീക്ഷിച്ചവര്ക്ക് നിരാശപ്പെടേണ്ടി വന്നു. മികച്ച സംവിധായകന്, നടന്, ഛായാഗ്രാഹകന് എന്നീ പുരസ്കാരങ്ങള് മാത്രമേ ചിത്രത്തിന് നേടാന് കഴിഞ്ഞുളളു. അവസാനം വരെ പ്രതീക്ഷ നിലനിര്ത്തിയ ശേഷമാണ് മികച്ച ചിത്രമായി റവെനെന്റിനെ പിന്തള്ളി സ്പോട്ട് ലൈറ്റ് തെരഞ്ഞെടുക്കപ്പെട്ടത്.