ഇടുക്കി: ജില്ലയിലെ ഗോത്രകലാരൂപങ്ങൾ പലതും അതിജീവന വെല്ലുവിളി നേരിടുന്ന സാഹചര്യത്തിൽ അവയുടെ സംരക്ഷണത്തിനായി പ്രത്യേക പദ്ധതി സർക്കാർ നടപ്പിലാക്കണമെന്ന് തപസ്യ കലാസാഹിത്യവേദി ഇടുക്കി ജില്ലാ വാർഷിക സമ്മേളനം പ്രമേയത്തിലൂടെ ആവശ്യപ്പെട്ടു.
തൊടുപുഴ താലൂക്ക് എൻ.എസ്.എസ് യൂണിയൻ ഹാളിൽ നടന്ന സമ്മേളനം സാഹിത്യകാരൻ ബാബുരാജ് കളമ്പൂർ ഉദ്ഘാടനം ചെയ്തു. ജില്ലാ പ്രസിഡന്റ് വി.കെ. സുധാകരന്റെ അധ്യക്ഷതയിൽ നടന്ന സമ്മേളനത്തിൽ സംസ്കാർ ഭാരതി ദേശീയ നിർവാഹകസമിതി അംഗം കെ. ലക്ഷ്മീനാരായണൻ മുഖ്യപ്രഭാഷണം നടത്തി.
തപസ്യ സംസ്ഥാന സമിതി അംഗം വി.കെ. ബിജു പത്മശ്രീ പി. നാരായണക്കുറുപ്പിനെ അനുസ്മരിച്ച് പ്രഭാഷണം നടത്തി. കേന്ദ്ര സർവകലാശാലയിൽ എം.എസ്.ഡബ്ല്യു ഒന്നാം റാങ്ക് നേടിയ തപസ്യ അംഗം അജയ് എം. കുഞ്ഞിക്കുട്ടനെ ചടങ്ങിൽ ആദരിച്ചു. അനൂപ് കുമാർ തൊടുപുഴ, സി.എസ്. ബിജു എന്നിവർ കവിതാലാപനവും അവതരിപ്പിച്ചു.
സമ്മേളനത്തിൽ എം.എം. മഞ്ജുഹാസൻ, എം.ബി. അജിമോൻ, എം.എൻ. ശശിധരൻ, ബിജു വി.എം., എക്സിൻ കുമാർ, എ.എൻ. വിനോദ് എന്നിവർ സംസാരിച്ചു.
യോഗത്തിൽ പുതിയ ജില്ലാ ഭാരവാഹികളെയും തെരഞ്ഞെടുത്തു. പി.കെ. രാധാകൃഷ്ണൻ രക്ഷാധികാരിയായും വി.കെ. സുധാകരൻ പ്രസിഡന്റായും എം.എം. മഞ്ജുഹാസൻ സെക്രട്ടറിയായും എം.ബി. അജിമോൻ ട്രഷററായും തെരഞ്ഞെടുക്കപ്പെട്ടു.
