രാജ്കോട്ട്: ദുബൈയിൽ നിന്ന് മുംബൈയിലേക്ക് സർവീസ് നടത്തിയിരുന്ന ഇൻഡിഗോ വിമാനത്തിൽ പുക ശ്രദ്ധയിൽപ്പെട്ടതിനെ തുടർന്ന് വിമാനം രാജ്കോട്ട് രാജ്യാന്തര വിമാനത്താവളത്തിൽ അടിയന്തരമായി ഇറക്കി. യാത്രക്കാരെയും ജീവനക്കാരെയും സുരക്ഷിതമായി വിമാനത്തിൽ നിന്ന് ഒഴിപ്പിച്ചതായി അധികൃതർ അറിയിച്ചു.
വിമാനത്തിനുള്ളിൽ പുക ശ്രദ്ധയിൽപ്പെട്ടതോടെ പൈലറ്റ് രാജ്കോട്ട് എയർ ട്രാഫിക് കൺട്രോളറുമായി ബന്ധപ്പെട്ടു അടിയന്തര ലാൻഡിംഗിന് അനുമതി തേടുകയായിരുന്നു. തുടർന്ന് വിമാനം സുരക്ഷിതമായി രാജ്കോട്ട് വിമാനത്താവളത്തിൽ ഇറക്കി.
സംഭവത്തെ തുടർന്ന് വിമാനത്താവളത്തിൽ പോലീസും അഗ്നിശമന സേനയും ആംബുലൻസുകളും മുൻകരുതലിന്റെ ഭാഗമായി വിന്യസിച്ചു. ആശങ്കപ്പെടേണ്ട സാഹചര്യമില്ലെന്നും എല്ലാ യാത്രക്കാരും സുരക്ഷിതരാണെന്നും രാജ്കോട്ട് പൊലീസ് കമ്മീഷണർ അറിയിച്ചു.
സമീപകാലത്ത് ഇൻഡിഗോ വിമാനവുമായി ബന്ധപ്പെട്ടുണ്ടാകുന്ന രണ്ടാമത്തെ സംഭവമാണിത്. കഴിഞ്ഞ മേയിൽ ഹൈദരാബാദിൽ നിന്ന് ചണ്ഡീഗഡിലേക്ക് പോയ ഇൻഡിഗോ വിമാനത്തിൽ ഒരു യാത്രക്കാരന്റെ പവർ ബാങ്ക് പൊട്ടിത്തെറിച്ചതിനെ തുടർന്ന് ക്യാബിനിൽ പുക നിറയുകയും യാത്രക്കാരെ ഒഴിപ്പിക്കേണ്ട സാഹചര്യം ഉണ്ടാവുകയും ചെയ്തിരുന്നു.
