തിരുവനന്തപുരം: വിവാദമായ മാസ്റ്റര്പ്ലാനുമായി ബന്ധപ്പെട്ട് തിരുവനന്തപുരം നഗരസഭ വിളിച്ച പ്രത്യേകയോഗത്തില് വനിതകള് അടക്കുളള ബിജെപി അംഗങ്ങള്ക്കെതിരേ കയ്യേറ്റശ്രമം. മേയര് വി.കെ പ്രശാന്തിന്റെ നേതൃത്വത്തില് സിപിഎം കൗണ്സിലര്മാരാണ് തര്ക്കത്തിനിടെ ബിജെപി അംഗങ്ങളെ കൈയ്യേറ്റം ചെയ്യാന് മുതിര്ന്നത്.
അശാസ്ത്രീയമായ മാസ്റ്റര്പ്ലാന് മാറ്റി പുതിയത് തയ്യാറാക്കണമെന്ന് സര്ക്കാരിനോട് ആവശ്യപ്പെടാനാണ് പ്രത്യേക കൗണ്സില് യോഗം ചേര്ന്നത്. എന്നാല് സിപിഎം അംഗങ്ങളുടെ നിലവിട്ട പെരുമാറ്റത്തെ തുടര്ന്ന് യോഗം അലങ്കോലപ്പെടുകയായിരുന്നു. വിഷയവുമായി ബന്ധപ്പെട്ട പ്രമേയത്തിന്മേല് ചര്ച്ച നടക്കവേ കാട്ടായിക്കോണത്ത് കഴിഞ്ഞ ദിവസമുണ്ടായ അക്രമം ബിജെപി നേതാവ് വി. മുരളീധരനും കൗണ്സിലര് എം.ആര് ഗോപനുമാണ് ആസൂത്രണം ചെയ്തതെന്ന സിപിഎം അംഗം ശ്രീകുമാറിന്റെ പരാമര്ശമാണ് പ്രശ്നങ്ങള്ക്ക് വഴിവെച്ചത്.
അടിസ്ഥാനരഹിതമായ ആരോപണം പിന്വലിക്കണമെന്ന് ബിജെപി അംഗങ്ങള് ഒന്നടങ്കം ആവശ്യപ്പെട്ടു. കാട്ടായിക്കോണത്ത് മാസ്റ്റര് പ്ലാനിനെതിരെ ജനകീയ പ്രതിഷേധം സംഘടിപ്പിച്ച ബിജെപി പ്രവര്ത്തകര്ക്ക് നേരെ സിപിഎം പ്രവര്ത്തകര് സംഘടിച്ചെത്തി അക്രമം നടത്തുകയായിരുന്നെന്നും കൗണ്സിലര്മാര് ചൂണ്ടിക്കാട്ടി. അക്രമത്തിന്റെയും പരിക്കേറ്റ ബിജെപി പ്രവര്ത്തകരുടെയും ചിത്രങ്ങള് അടങ്ങിയ പോസ്റ്ററുകള് ബിജെപി അംഗങ്ങള് ഉയര്ത്തിക്കാട്ടി. കാട്ടായിക്കോണത്തെ കണ്ണൂരാക്കാനാണ് സിപിഎം ശ്രമമെന്ന തലക്കെട്ടോടെയായിരുന്നു പോസ്റ്ററുകള്.
തര്ക്കത്തിനൊടുവില് സിപിഎം അംഗങ്ങള് കൗണ്സില് യോഗം അലങ്കോലപ്പെടുത്താന് ശ്രമം തുടങ്ങി. മേയറെ തടഞ്ഞ ബിജെപിയുടെ വനിതാ അംഗങ്ങളായ വിജയകുമാരി, മിനി, ചിഞ്ചു എന്നിവരെ മേയര് തന്നെ പിടിച്ചുതള്ളുന്ന സ്ഥിതിയുണ്ടായി. തുടര്ന്ന് കൗണ്സില് ബഹിഷ്കരിച്ച ബിജെപി അംഗങ്ങള് മേയറുടെ ഓഫീസിന് മുന്നില് കുത്തിയിരുന്ന് പ്രതിഷേധിച്ചു.
കാട്ടായിക്കോണത്ത് കഴിഞ്ഞ ദിവസം സിപിഎം നടത്തിയ അക്രമത്തില് ബിജെപി മുന് സംസ്ഥാന അദ്ധ്യക്ഷന് വി. മുരളീധരന് അടക്കം മുപ്പതോളം പേര്ക്ക് പരിക്കേറ്റിരുന്നു.
