മുംബൈ: ഐ.പി.എല്ലിൽ മുംബൈ ഇന്ത്യൻസിനെ കീഴടക്കി ഗുജറാത്ത് ലയൺസിന് തുടർച്ചയായ മൂന്നാം ജയം. അവസാന പന്ത് വരെ ആവേശം നിറഞ്ഞ മൽസരത്തിൽ, ലയൺസ് മൂന്ന് വിക്കറ്റിനാണ് മുംബൈയെ കീഴടക്കിയത്. അർദ്ധ സെഞ്ചുറി നേടിയ ഓസീസ് താരം ആരോൺ ഫിഞ്ചിന്റെ മികവിലാണ് ലയൺസ് ജയത്തിലേക്ക് മുന്നേറിയത്.
ടോസ് നേടിയ ലയൺസ് മുംബൈയെ ബാറ്റിംഗിന് അയയ്ക്കുകയായിരുന്നു. എട്ട് വിക്കറ്റ് നഷ്ടത്തിൽ മുംബൈ 143 റൺസ് നേടിയപ്പോൾ, ലയൺസ് 7 വിക്കറ്റ് നഷ്ടത്തിൽ 147 റൺസെടുത്തു. ആരോൺ ഫിഞ്ചാണ് കളിയിലെ താരം.
ഇന്നലെ നടന്ന ആദ്യ മത്സരത്തിൽ കൊൽക്കത്ത നൈറ്റ് റൈഡേഴ്സിന് ജയം. സൺറൈസേഴ്സ് ഹൈദരാബാദിനെ എട്ട് വിക്കറ്റിനാണ് കൊൽക്കത്ത കീഴടക്കിയത്. 143 റൺസ് വിജയലക്ഷ്യം പത്ത് പന്ത് ശേഷിക്കെ കൊൽക്കത്ത മറികടന്നു. പുറത്താകാതെ 90 റൺസ് എടുത്ത നായകൻ ഗൗതം ഗംഭീറാണ് വിജയശിൽപ്പി. .
ഇന്ന് നടക്കുന്ന മൽസരങ്ങളിൽ പഞ്ചാബ്-പൂണെയെയും, ബാംഗ്ലൂർ-ഡൽഹിയെയും നേരിടും.
