കോഴിക്കോട്: രാജ്യം എഴുപതാം സ്വാതന്ത്ര്യദിനം ആഘോഷിച്ചപ്പോള് അത് ഇരട്ടിമധുരമായതിന്റെ സന്തോഷത്തിലാണ് കോഴിക്കോട് ചെലപ്രം നിവാസികള്. മലയാളത്തിലെ മഹാനടന് മോഹന്ലാലിനൊപ്പമായിരുന്നു ഇക്കുറി ചെലപ്രം സ്വദേശികളുടെ സ്വാതന്ത്ര്യദിനാഘോഷം.
ജിബു ജേക്കബിന്റെ മോഹന്ലാല് ചിത്രത്തിന്റെ ഷൂട്ടിങ്ങ് ലൊക്കേഷനായിരുന്നു ആഘോഷവേദി. പുതിയ സിനിമയ്ക്കായി സെറ്റിട്ട കീഴാറ്റൂര് ഗ്രാമപഞ്ചായത്ത് മുറ്റത്ത് മോഹന്ലാല് ദേശീയപതാക ഉയര്ത്തി. വെളള ഷര്ട്ടും മുണ്ടും അണിഞ്ഞെത്തിയ ലാല് കുട്ടികള്ക്കും നാട്ടുകാര്ക്കുമൊപ്പം ദേശീയഗാനവും ആലപിച്ചു.
ഒടുവില് ഭാരത് മാതാവിന് ജയ് വിളിച്ച ശേഷം നന്മ സ്കൂളിലെ കുട്ടികള്ക്ക് താരത്തിന്റെ വക മധുരവും. അഭ്രപാളിയില് അഭിനയവിസ്മയം പകര്ന്ന നടനെ അടുത്തുകണ്ട ആഹ്ലാദത്തിലും അവിശ്വസനീയതയിലുമായിരുന്നു നാട്ടുകാര്.
സിനിമയുടെ അണിയറ പ്രവര്ത്തകരും ആഘോഷത്തില് പങ്കുചേര്ന്നു. ജിബുജേക്കബ് സംവിധാനം ചെയ്യുന്ന സിനിമയില് കീഴാറ്റൂര് ഗ്രാമപഞ്ചായത്ത് ഉദ്യോഗസ്ഥനായാണ് മോഹന്ലാല് വേഷമിടുന്നത്.
