ന്യൂഡല്ഹി: രാജ്യത്ത് മണ്സൂണ് കാലത്ത് H1N1 (ഇന്ഫ്ലുവന്സ എ/സൈ്വന് ഫ്ലൂ) കേസുകള് വര്ധിക്കുന്ന സാഹചര്യത്തില് ജാഗ്രതാ നിര്ദേശവുമായി ഇന്ത്യന് മെഡിക്കല് അസോസിയേഷന് (IMA). ഡല്ഹിയില് മാത്രം 1,770ലേറെ കേസുകള് സ്ഥിരീകരിച്ചതായാണ് റിപ്പോര്ട്ട്. മഹാരാഷ്ട്ര, കര്ണാടക, പശ്ചിമ ബംഗാള് തുടങ്ങിയ സംസ്ഥാനങ്ങളിലും രോഗബാധ റിപ്പോര്ട്ട് ചെയ്തിട്ടുണ്ട്.
അതേസമയം വൈറസിന് പുതിയ വകഭേദങ്ങളൊന്നും ഉണ്ടായിട്ടില്ലെന്നും ഭയപ്പെടേണ്ട സാഹചര്യമില്ലെന്നും IMA വ്യക്തമാക്കി. ഭൂരിഭാഗം പേരിലും രോഗലക്ഷണങ്ങള് സ്വാഭാവികമായി മാറാറുണ്ടെന്നും സംഘടന അറിയിച്ചു. പെട്ടെന്നുള്ള പനി, വിറയല്, വരണ്ട ചുമ, തൊണ്ടവേദന, തലവേദന, ശക്തമായ ശരീരവേദന, ക്ഷീണം, മൂക്കടപ്പ്, മൂക്കൊലിപ്പ് എന്നിവയാണ് പ്രധാന ലക്ഷണങ്ങള്. കുട്ടികളില് ഛര്ദ്ദിയും വയറിളക്കവും ഉണ്ടാകാം.
H1N1 വൈറസ് ബാധയായതിനാല് ആന്റിബയോട്ടിക്കുകള് രോഗത്തിന് ഫലപ്രദമല്ല. ഡോക്ടറുടെ നിര്ദേശമില്ലാതെ അസിത്രോമൈസിന്, അമോക്സിസിലിന് തുടങ്ങിയ ആന്റിബയോട്ടിക്കുകളോ ഒസെല്റ്റാമിവിര് പോലുള്ള ആന്റിവൈറല് മരുന്നുകളോ കഴിക്കരുതെന്നും IMA മുന്നറിയിപ്പ് നല്കി.
ശ്വാസതടസം, നെഞ്ചുവേദന, ചുണ്ടുകളിലോ വിരലുകളിലോ നീലനിറം, രക്തം തുപ്പുക, അമിതമായ മയക്കം, അപസ്മാരം, തുടര്ച്ചയായ ഛര്ദ്ദി എന്നിവ ഗുരുതര ലക്ഷണങ്ങളാണ്. കുട്ടികളില് ഭക്ഷണം കഴിക്കാതിരിക്കുക, അമിതമായ തളര്ച്ച, ശ്വാസമെടുക്കുമ്പോള് നെഞ്ച് ഉള്ളിലേക്ക് വലിയുക എന്നിവയും ശ്രദ്ധിക്കണം.
കൈകള് സോപ്പും വെള്ളവും ഉപയോഗിച്ച് ഇടയ്ക്കിടെ കഴുകുക, ചുമയ്ക്കുമ്പോഴും തുമ്മുമ്പോഴും മൂക്കും വായും മൂടുക, തിരക്കേറിയ സ്ഥലങ്ങളില് മാസ്ക് ധരിക്കുക എന്നിവയാണ് പ്രധാന പ്രതിരോധ മാര്ഗങ്ങള്. പനി മാറി കുറഞ്ഞത് 24 മണിക്കൂര് കഴിയുന്നതുവരെ സ്കൂളിലും ജോലിക്കും പോകാതിരിക്കാനും നിര്ദേശമുണ്ട്. ഗര്ഭിണികള്, വയോധികര്, മറ്റ് ആരോഗ്യപ്രശ്നങ്ങളുള്ളവര്, ആരോഗ്യപ്രവര്ത്തകര് എന്നിവര് വാക്സിനേഷന് സംബന്ധിച്ച് ഡോക്ടറുടെ ഉപദേശം തേടണം.
