കൊച്ചി: ഐഎസ്എല് ഫൈനലില് ഇന്ന് കേരള ബ്ലാസ്റ്റേഴ്സ് അത്ലറ്റികോ ഡി കൊല്ക്കത്ത പോരാട്ടം. കന്നി കിരീടം സ്വന്തമാക്കാമെന്ന മോഹവുമായി ഫൈനലിനിറങ്ങുന്ന കേരളത്തിന് ഹോം ഗ്രൗണ്ടിലാണ് മത്സരമെന്നത് തുണയാകും.
ഐഎസ്എല് ആദ്യ സീസണ് ഫൈനലിന് സമാനമായി മൂന്നാം പതിപ്പിന്റെ ഫൈനലിലും കേരളത്തിന്റെ കൊമ്പന്മാരും അത്ലറ്റികോ ഡി കൊല്ക്കത്തയും ഏറ്റുമുട്ടും. അന്ന് കേരളത്തെ തോല്പ്പിച്ച് കിരീടം ചൂടിയ കൊല്ക്കത്തയ്ക്ക് മറുപടി നല്കാന് ബ്ലാസ്റ്റേഴ്സിന് ഇതിലും നല്ലൊരവസരം വേറെയില്ല.
ഈ സീസണില് കൊച്ചിയില് വച്ചേറ്റുമുട്ടിയപ്പോഴും വിജയം കൊല്ക്കത്തയ്ക്കൊപ്പമായിരുന്നു. കൊല്ക്കത്തയില് നടന്ന മത്സരത്തില് ഇരു ടീമുകളും ഓരോ ഗോള് വീതം നേടി സമനിലയില് പിരിഞ്ഞു.
രണ്ട് മഞ്ഞക്കാര്ഡ് കണ്ട് സസ്പെന്ഷനിലായ ഹോസു കുറെയ്സില്ലെന്നത് കേരളത്തിന് വെല്ലുവിളിയാണ്. എന്നാല് ശക്തമായ പ്രതിരോധ നിരയും ഗാലറിയുടെ പിന്തുണയും കൊണ്ട് ഇതു മറികടക്കാനാകുമെന്നാണ് കേരളത്തിന്റെ പ്രതീക്ഷ.
ഇയാന് ഹ്യൂമും ഹെല്ഡര് പോസ്റ്റിഗയുമുള്പ്പെട്ട കൊല്ക്കത്ത മുന്നേറ്റ നിരയ്ക്ക് കേരളത്തിന്റെ പ്രതിരോധക്കോട്ട തകര്ക്കാനാകുമോയെന്നാണ് എല്ലാവരും ഉറ്റുനോക്കുന്നത്. സ്വന്തം ഗ്രൗണ്ടില് ആവര്ത്തിച്ചുവരുന്ന കേരളത്തിന്റെ തകര്പ്പന് ഫോം ഫൈനലിലും പ്രതിഫലിക്കുമെന്നാണ് ആരാധകരുടെ പക്ഷം.
ഒപ്പം സ്റ്റീവ് കോപ്പലെന്ന കോച്ച്എന്തൊക്കെ തന്ത്രങ്ങള് ഫൈനലില് പയറ്റുമെന്നും ആരാധകര് ഉറ്റുനോക്കുന്നു. ഇതോടൊപ്പം മുന്നേറ്റ നിരയും കൂടി താളം കണ്ടെത്തിയാല് ഐഎസ്എല് കിരീടം കേരളത്തിന് സ്വന്തമാക്കാം.