“മനോജവം മാരുത തുല്യവേഗം
ജിതേന്ദ്രിയം ബുദ്ധിമതാം വരിഷ്ടം
വാതാത്മജം വാനരയൂഥമുഖ്യം
ശ്രീരാമദൂതം ശിരസാ നമാമി ”
ഇന്ന് ചൈത്രമാസത്തിലെ ശുക്ലപക്ഷ പൗർണമി. ഹിന്ദു വിശ്വാസമനുസരിച്ച് ശ്രീരാമഭക്തനായ ആഞ്ജനേയസ്വാമികളുടെ ജന്മദിനമാണിന്ന്. ശ്രീരാമന്റെ യഥാർത്ഥ സുഹൃത്തും ഭക്തനുമായി അറിയപ്പെടുന്ന ശ്രീഹനുമാൻ ചിരഞ്ജീവിയാണെന്നാണ് ഐതിഹ്യം.
“പശ്യ സഖേ വടുരൂപിണം ലക്ഷ്മണ!
നിശ്ശേഷശബ്ദശാസ്ത്രമനേന ശ്രുതം.
ഇല്ലൊരപശബ്ദമെങ്ങുമേ വാക്കിങ്കൽ
നല്ല വൈയാകരണൻ വടു നിർണ്ണയം”
ശ്രീരാമചന്ദ്രൻ ലക്ഷ്മണനോട് ഹനുമാനെപ്പറ്റി പറയുന്നത് അദ്ധ്യാത്മരാമായണത്തിൽ വിവരിക്കുന്നത് ഇങ്ങനെയാണ്.
രാമായണത്തിലെ ഏറ്റവും പ്രധാന കഥാപാത്രമാണ് ഹനുമാൻ. സമുദ്രം ചാടിക്കടന്ന് ലങ്കയിലെത്തി സീതയെ കണ്ടുപിടിച്ച് ശ്രീരാമസന്ദേശം നൽകിയത് ഹനുമാനാണ്. തുടർന്ന് ശ്രീരാമദൂതൻ ലങ്കയിലെത്തിയെന്നറിയിക്കാൻ ലങ്കയിലെ രമ്യഹർമ്മ്യങ്ങൾ ചുട്ടു ഭസ്മമാക്കിയതും രാവണപുത്രൻ അക്ഷകുമാരനെ വധിച്ചതും ഇതേ ഹനുമാൻ തന്നെ.
രാമ രാവണ യുദ്ധ സമയത്ത് ഇന്ദ്രജിത്തിന്റെ ബ്രഹ്മാസ്ത്രമേറ്റ് എല്ലാവരും ബോധരഹിതരായപ്പോൾ ഋശ്യമൂകാചലമേറി മൃതസഞ്ജീവനി എത്തിച്ചതും ശ്രീഹനുമാനാണ്. ശ്രീരാമനാമം ലോകത്ത് നിലനിൽക്കുന്നിടത്തോളം ചിരഞ്ജീവിയായി കഴിയാൻ അനുവാദം നേടിയ അഞ്ജനാപുത്രൻ ഭക്തജനലക്ഷങ്ങളുടെ ഹൃദയത്തിൽ ആരാധനാ മൂർത്തിയായി ഇന്നും ജീവിക്കുന്നു.
