തിരുവനന്തപുരം: മേളയുടെ മൂന്നാം ദിനമായ ഇന്ന് 67 സിനിമകള് പ്രദര്ശിപ്പിക്കും. അമിത് വി മസുര്ക്കറിന്റെ ന്യൂട്ടന്, സഞ്ജു സുരേന്ദ്രന്റെ ഏദന്, നിള മദ്ഹബ് പാണ്ഡെയുടെ ഡാര്ക്ക് വിന്ഡ് എന്നിവയാണ് മത്സര വിഭാഗത്തിലെ ഇന്ത്യന് സാന്നിധ്യങ്ങള്. ഗ്രെയ്ന്, വൈറ്റ് ബ്രിഡ്ജ്, വാജിബ് തുടങ്ങിയവയാണ് മത്സര വിഭാഗത്തിലെ മറ്റു ചിത്രങ്ങള്. ഗോവന് മേളയില് ശ്രദ്ധേയമായ ടേക്ക് ഓഫ്, അതിശയങ്ങളുടെ വേനല്, കറുത്ത ജൂതന് എന്നിവയാണ് മലയാള സിനിമാ വിഭാഗത്തില് പ്രദര്ശിപ്പിക്കുക.
കണ്ട്രി ഫോക്കസില് ഫെര്ണാന്ഡ പെസോവയുടെ സ്റ്റോറീസ് ദാറ്റ് ഔര് സിനേമ ഡിഡ് (നോട്ട്) ടെല് അടക്കം നാല് ബ്രസീലിയന് ചിത്രങ്ങള് പ്രദര്ശിപ്പിക്കും. ടി.വി ചന്ദ്രന്റെ ഡാനി, അലക്സാണ്ടര് സുക്കറോവിന്റെ ദ സണ് എന്നിവയാണ് ഇന്നത്തെ ജൂറി ചിത്രങ്ങള്. മഹ്മത് സലേ ഹാറൂണിന്റെ മൂന്ന് ഫ്രഞ്ച് ചിത്രങ്ങളും മിഷേല് ഫ്രാങ്കോയുടെ മൂന്ന് മെക്സിക്കന് ചിത്രങ്ങളും കണ്ടംപററി വിഭാഗത്തില് പ്രദര്ശിപ്പിക്കും.
സത്യജിത്ത് റേ സംവിധാനം ചെയ്ത ചാരുലതയുടെ പ്രത്യേക പ്രദര്ശനം വൈകിട്ട് 8.45 ന് ശ്രീ തിയേറ്ററില് നടക്കും. ടോണി ഗാറ്റ്ലിഫിന്റെ ഫ്രഞ്ച് ചിത്രം ഡ്ജാം, സദഫ് ഫൊറോഖിയുടെ ഇറാനിയന് ചിത്രം ആവ, ജാന് സ്പെക്കന്ബച്ചിന്റെ ജര്മ്മന് ചിത്രം ഫ്രീഡം എന്നിവയടക്കം 24 ചിത്രങ്ങളാണ് ലോക സിനിമാ വിഭാഗത്തില് പ്രദര്ശിപ്പിക്കുന്നത്.
