ന്യൂഡൽഹി: ഐഎസ്എല്ലിൽ ഡേവിഡ് ജെയിംസിന്റെ കീഴിൽ ആദ്യ എവേ മത്സരത്തിന് കേരളാ ബ്ലാസ്റ്റേഴ്സ് ഇന്ന് ഇറങ്ങും. ഡൽഹി ഡൈനാമോസാണ് എതിരാളി. എട്ട് മത്സരങ്ങളിൽ നിന്ന് എട്ട് പോയിന്റ് മാത്രമുള്ള ബ്ലാസ്റ്റേഴ്സിന് മുന്നോട്ട് പോക്ക് സുഗമമാകണമെങ്കിൽ ഇന്ന് ജയം ആനിവാര്യമാണ്.
പരുക്കിനെ തുടർന്ന് കഴിഞ്ഞ 2 മത്സരങ്ങളിൽ കളിക്കാൻ കഴിയാതിരുന്ന സി കെ വിനീത് ഇന്ന് ഇറങ്ങുമെന്നാണ് സൂചന. ജാക്കിചന്ദ് സിംഗിന് പകരമാകും വിനീതിനെ ആദ്യ ഇലവനിൽ ഉൾപ്പെടുത്തുക. സ്വന്തം മൈതാനത്ത് ആണെങ്കിലും ഡൽഹിയും സമ്മർദ്ദത്തിലാണ്. എട്ട് മത്സരങ്ങളിൽ നിന്ന് നാല് പോയിന്റുമായി അവസാന സ്ഥാനത്താണ് ഡൽഹി ഡൈനാമോസ്.
തുടർച്ചയായ ആറ് പരാജയങ്ങളുടെ കനത്ത ഭാരത്തിൽ ആഴ്ന്നു പോയിരുന്ന ഡൽഹിയ്ക്ക് ഈ സീസണിൽ അൽപ്പം പ്രതീക്ഷ നൽകുന്ന ഒരു ഫലമായിരുന്നു കഴിഞ്ഞ മൽസരത്തിലേത്. ചെന്നൈയിൻ എഫ്സിയുടെ പക്കൽ നിന്ന് അവസാന മുഹൂർത്തത്തിൽ ഒരു പോയിന്റ് തട്ടിയെടുക്കാൻ അവർക്ക് സാധിച്ചു. എന്നാൽ ഇപ്പോഴും പട്ടികയിലെ ഏറ്റവും അവസാനത്തെ സ്ഥാനത്തു തന്നെ കഴിയുന്ന അവർക്ക് അതിഥികളായെത്തുന്ന മഞ്ഞപ്പടയെ പരാജയപ്പെടുത്തി പരമാവധി പോയിന്റുകൾ തങ്ങളുടെ പേരിൽ കൂട്ടിച്ചേർക്കുന്നതിനായിരിക്കും ഡൽഹിയുടെ ശ്രമം.
അതേ സമയം, കേരളമാകട്ടെ പുതിയ പരിശീലകനായി മടങ്ങിയെത്തിയിരിക്കുന്ന ഡേവിഡ് ജെയിംസിന്റെ കീഴിൽ എഫ്സി പൂനെയെ 1-1 ഗോൾ നിലയിൽ തളച്ചു കൊണ്ട് മെച്ചപ്പെട്ട പ്രകടനം കാഴ്ച വെച്ചതിന്റെ ആത്മവിശ്വാസത്തിലുമാണ്. മുൻമൽസരങ്ങളിൽ കാണാതിരുന്ന ആക്രമണോത്സുകത പ്രകടമാക്കിയ കേരളത്തിന്റെ മഞ്ഞപ്പടയ്ക്ക് ഡൽഹിയുടെ മുകളിൽ വിജയത്തോടെ ആധിപത്യം സ്ഥാപിക്കുകയായിരിക്കും ലക്ഷ്യം.
