മൊഹാലി: ഐപിഎല്ലിൽ ഇന്ന് രണ്ട് മത്സരങ്ങൾ. നാല് മണിയ്‌ക്ക് മൊഹാലിയിൽ നടക്കുന്ന ആദ്യ മത്സരത്തിൽ കിംഗ്സ് ഇലവൻ പഞ്ചാബ് – ഡെൽഹി ഡെയർ ഡെവിൾസിനെ നേരിടും. കൊൽക്കത്ത നൈറ്റ് റൈഡേഴ്സും – റോയൽ ചലഞ്ചേഴ്സ് ബാംഗ്ലൂരും തമ്മിലുള്ള രണ്ടാം മത്സരം കൊൽക്കത്ത ഈഡൻ ഗാർഡൻസിൽ രാത്രി എട്ടിന് ആരംഭിക്കും.
കിംഗ്സ് ഇലവൻ പഞ്ചാബും, ഡൽഹി ഡയർ ഡെവിൾസും ഇന്ന് നേർക്കുനേർ. പുതിയ നായകർക്ക് കീഴിൽ പഞ്ചാബും ഡൽഹിയും ഇറങ്ങുന്നു. പുതിയ താരനിരയുമായി. പഞ്ചാബിന്‍റെ നായകനായി ആർ അശ്വിൻ എത്തുന്നു. ഡൽഹിയുടെ തലവര മാറ്റാനെത്തുന്നതാവട്ടെ, ഗൗതം ഗംഭീറും. രണ്ട് തവണ കൊൽക്കത്ത നൈറ്റ് റൈഡേഴ്സിനെ കിരീടം ചൂടിച്ചാണ് ഡൽഹിയിലേക്കുള്ള ഗംഭീറിന്‍റെ മടങ്ങിവരവ്.
മികച്ച തുടക്കം നൽകാൻ ശ്രേയസ് അയ്യരും ഋഷഭ് പന്തും പ്രിഥ്വി ഷായും മധ്യനിരയിൽ ഗ്ലെൻ മാക്സ്‍വെൽ, ഒപ്പം ബൗളിംഗ് ഓൾറൗണ്ടർമാരായി ക്രിസ് മോറിസും, ഡാൻ ക്രിസ്റ്‍റ്യനും വിജയ് ശങ്കറും. ട്രന്‍റ് ബോൾട്ടും അമിത് മിശ്രയും നയിക്കുന്ന ബൗളിംഗ് നിരയും മികച്ചത്.
പഞ്ചാബ് നിരയിൽ യുവരാജ് മടങ്ങിയെത്തുന്നു. ഒപ്പം ക്രിസ് ഗെയ്‍ലും അരോൺ ഫിഞ്ചുമുണ്ട്. ഡേവിഡ് മില്ലറും കരുൺ നായരും ചേരുമ്പോൾ ബാറ്റിംഗ് ശക്തം. ഓൾറൗണ്ട് മികവാണ് ടീമിനെ ശ്രദ്ധേയമാക്കുന്നത്.
പഞ്ചാബ് ബാറ്റിംഗ് വെടിക്കെട്ടിന് ഊർജം പകരാൻ പരിശീലനക്കുപ്പായത്തിൽ വീരേന്ദർ സേവാഗും, ഡൽഹിയുടെ പരിശീലനക്കുപ്പായത്തിൽ മുൻ ഓസിസ് നായകൻ റിക്കിപോണ്ടിംഗും ഉണ്ട്.
അരയും തലയും മുറുക്കി ഇരു ടീമുകളും പുതുമോടിയിലെത്തുമ്പോൾ മൊഹാലിയിൽ തീപാറും എന്നുറപ്പ്.
