വാംങ്കഡെ: ഐപിഎല്ലിൽ നിലവിലെ ചാമ്പ്യന്മാരായ മുംബൈ ഇന്ത്യൻസിന് തുടർച്ചയായ മൂന്നാം തോൽവി. വാങ്കഡെയിൽ നടന്ന രണ്ടാം ഹോം മത്സരത്തിൽ മുംബൈയെ 7 വിക്കറ്റിനാണ് ഡൽഹി ഡെയർ ഡെവിൾസ് കീഴടക്കിയത്. 195 റൺസ് വിജയലക്ഷ്യം പടുത്തുയർത്തിയിട്ടും മുംബൈയുടെ ബൗളർമാർക്ക് പ്രതിരോധിക്കാനായില്ല.
പുറത്താകാതെ 53 പന്തിൽ 91 റൺസ് അടിച്ച ജേസൺ റോയാണ് ഡൽഹിയുടെ വിജയശിൽപി. 47 റൺസ് എടുത്ത ഋഷഭ് പന്തും 27 റൺസ് എടുത്ത ശ്രേയസ് അയ്യരും ജേസൺ റോയ്ക്ക് മികച്ച പിന്തുണ നൽകി.
ആദ്യം ബാറ്റ് ചെയ്ത മുംബൈ ഏഴ് വിക്കറ്റ് നഷ്ടത്തിലാണ് 194 റൺസ് എടുത്തത്. ഓപ്പണിംഗ് വിക്കറ്റിൽ സൂര്യ കുമാർ യാദവും, എവിൻ ലൂയിസും ചേർന്ന് 9 ഓവറിൽ 102 റൺസ് എടുത്തു.
എന്നാൽ മധ്യനിരയിൽ മികച്ച കൂട്ടുകെട്ട് പടുത്തുയർത്താൻ മുംബൈയ്ക്ക് സാധിച്ചില്ല.