ന്യൂഡല്‍ഹി: പ്രധാനമന്ത്രി നരേന്ദ്ര മോദി ഡിസംബര്‍ 11, 12 തീയതികളില്‍ കാനഡ സന്ദര്‍ശിക്കും. ദീര്‍ഘകാലത്തെ നയതന്ത്ര തര്‍ക്കങ്ങള്‍ക്കുശേഷം ഇന്ത്യയും കാനഡയും തമ്മിലുള്ള ബന്ധം ശക്തിപ്പെടുത്താനുള്ള ശ്രമങ്ങള്‍ തുടരുന്നതിനിടെ കനേഡിയന്‍ പ്രധാനമന്ത്രി മാര്‍ക്ക് കാര്‍ണിയുമായി മോദി കൂടിക്കാഴ്ച നടത്തും. വ്യാപാരം, ഊര്‍ജം, സാങ്കേതികവിദ്യ, സുരക്ഷ, ജനങ്ങള്‍ തമ്മിലുള്ള ബന്ധം തുടങ്ങിയ മേഖലകളില്‍ സഹകരണം വര്‍ധിപ്പിക്കാനും വ്യക്തമായ പുരോഗതി കൈവരിക്കാനും ഇരു രാജ്യങ്ങളും ലക്ഷ്യമിടുന്നു. സന്ദര്‍ശനവുമായി ബന്ധപ്പെട്ട പ്രഖ്യാപനം ഒട്ടാവയിലെ ഇന്ത്യന്‍ ഹൈക്കമ്മീഷനാണ് വെള്ളിയാഴ്ച നടത്തിയത്. കാല്‍ഗറിയിലെ ഒരു റസ്റ്റോറന്റില്‍ സന്ദര്‍ശകരുമായി നടത്തിയ സംവാദത്തിനിടെ വ്യാഴാഴ്ച കാര്‍ണിയും മോദിയുടെ വരാനിരിക്കുന്ന സന്ദര്‍ശനം സ്ഥിരീകരിച്ചിരുന്നു.
മോദിയുടെ കാനഡ സന്ദര്‍ശനത്തില്‍ വ്യാപാര ചര്‍ച്ചകള്‍ക്ക് പ്രധാന്യം ലഭിക്കുമെന്നാണ് പ്രതീക്ഷിക്കുന്നത്. പ്രസിഡന്റ് ഡൊണാള്‍ഡ് ട്രംപിന്റെ ഭരണത്തിനു കീഴില്‍ അമേരിക്കയുമായുള്ള ബന്ധത്തില്‍ വെല്ലുവിളികള്‍ നേരിടുന്ന കാനഡ, സാമ്പത്തിക പങ്കാളിത്തം കൂടുതല്‍ രാജ്യങ്ങളിലേക്ക് വ്യാപിപ്പിക്കാനുള്ള ശ്രമത്തിലാണ്. കനേഡിയന്‍ അന്താരാഷ്‌ട്ര വ്യാപാരമന്ത്രി മനീന്ദര്‍ സിദ്ധു നിലവില്‍ ആറു ദിവസത്തെ വ്യാപാര ദൗത്യത്തിന്റെ ഭാഗമായി ഇന്ത്യയിലുണ്ട്. ഈ വര്‍ഷം അവസാനത്തോടെ ഇന്ത്യയും കാനഡയും തമ്മിലുള്ള വ്യാപാര കരാറിന് അന്തിമരൂപം നല്‍കുന്നതിനുള്ള ചര്‍ച്ചകളും പുരോഗമിക്കുകയാണ്. 2030ഓടെ ഇരുരാജ്യങ്ങളും തമ്മിലുള്ള വാര്‍ഷിക ഉഭയകക്ഷി വ്യാപാരം 70 ബില്യണ്‍ യുഎസ് ഡോളറായി ഉയര്‍ത്തുകയാണ് ലക്ഷ്യം.
നിലവിലെ വ്യാപാരത്തിന്റെ ഇരട്ടിയിലധികം വളര്‍ച്ച ലക്ഷ്യമിടുന്ന ഈ നീക്കം സാമ്പത്തിക സഹകരണത്തിന് പുതിയ അവസരങ്ങള്‍ തുറക്കുമെന്നാണ് പ്രതീക്ഷ. മോദിയും കാര്‍ണിയും ചൊവ്വാഴ്ച നടത്തിയ സംഭാഷണത്തില്‍ തന്ത്രപരമായ പങ്കാളിത്തം ശക്തിപ്പെടുത്തുന്നതിനുള്ള വഴികള്‍ ചര്‍ച്ച ചെയ്തതായി പ്രധാനമന്ത്രി വ്യക്തമാക്കി. വ്യാപാരം, ഊര്‍ജം, സാങ്കേതികവിദ്യ, സുരക്ഷ, ജനങ്ങള്‍ തമ്മിലുള്ള ബന്ധം തുടങ്ങിയ മുന്‍ഗണനാ മേഖലകളില്‍ സഹകരണം വര്‍ധിപ്പിക്കാനും ബന്ധങ്ങളില്‍ കൂടുതല്‍ പുരോഗതി ഉറപ്പാക്കാനും ഇരു നേതാക്കളും സമ്മതിച്ചു. സമഗ്ര സാമ്പത്തിക പങ്കാളിത്ത കരാറായ സംബന്ധിച്ച ചര്‍ച്ചകള്‍ എത്രയും വേഗം പൂര്‍ത്തിയാക്കാനുള്ള പ്രതിബദ്ധതയും നേതാക്കള്‍ ആവര്‍ത്തിച്ചു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
കരാര്‍ യാഥാര്‍ഥ്യമായാല്‍ ഇരുരാജ്യങ്ങള്‍ക്കുമിടയിലെ വ്യാപാരവും നിക്ഷേപവും കൂടുതല്‍ വിപുലീകരിക്കാന്‍ സാധിക്കുമെന്നാണ് പ്രതീക്ഷ. ഇന്തോ-പസഫിക് മേഖലയിലെ ഭൗമരാഷ്‌ട്രീയ അനിശ്ചിതത്വവും ഊര്‍ജം, കാര്‍ഷികം തുടങ്ങിയ മേഖലകളില്‍ വിശ്വസനീയമായ പങ്കാളികളുടെ പ്രാധാന്യവും നേതാക്കള്‍ ചര്‍ച്ച ചെയ്തു. മാര്‍ച്ചിലാണ് കാര്‍ണി അവസാനമായി ഇന്ത്യ സന്ദര്‍ശിച്ചത്. വരാനിരിക്കുന്ന മോദിയുടെ സന്ദര്‍ശനം ഇരുരാജ്യങ്ങളും തമ്മിലുള്ള ബന്ധം കൂടുതല്‍ ശക്തിപ്പെടുത്താനുള്ള ശ്രമങ്ങള്‍ക്ക് പ്രാധാന്യമേകുമെന്നാണ് വിലയിരുത്തല്‍.
