ഹൈദരാബാദ്: ഐ.പി.എല്ലില് ഇന്ന് നടക്കുന്ന മത്സരത്തില് റോയല് ചലഞ്ചേഴ്സ് ബാംഗ്ളൂര് സണ്റൈസേഴ്സ് ഹൈദരാബാദിനെ നേരിടും. ഹൈദരാബാദില് രാത്രി എട്ടിനാണ് മത്സരം.
ക്യാപ്റ്റന് കോഹ്ലിയുടെ ടീമിന് ഈ സീസണില് ഇതുവരെ കളിച്ച 9 മത്സരങ്ങളില് മൂന്നെണ്ണം മാത്രമാണ് ജയിക്കാനായത്. പ്രമുഖ താരങ്ങളുണ്ടെങ്കിലും ആര്ക്കും സ്ഥിരത പുലര്ത്താന് സാധിക്കാത്തത് ടീം മാനേജ്മെന്റിന് തലവേദനയാണ്. അതുകൊണ്ടു തന്നെ ടീമിന് താളം കണ്ടെത്താനും സാധിച്ചിട്ടില്ല. ആര്ക്കും സ്ഥിരതയില്ലാത്തതിനാല് പ്ലേയിംഗ് ഇലവനെ നിശ്ചയിക്കുക എന്നത് വലിയ പ്രതിസന്ധി സൃഷ്ടിക്കുന്നു. വിരാട് കോഹ്ലിയും ബ്രണ്ടന് മക്കല്ലവും ഏബി ഡിവിലിയേഴ്സും ഉള്പ്പെടുന്ന ബാറ്റിംഗ് നിരയ്ക്ക് ടൂര്ണമെന്റില് യാതൊരു പ്രഭാവവും ചെലുത്താന് സാധിച്ചിട്ടില്ല. അതേ അവസ്ഥ തന്നെയാണ് ബൗളിംഗിനും. ഉമേഷ് യാദവും യുസ്വേന്ദ്ര ചാഹലും ടിം സൗത്തിയും ടീമിലുണ്ടെങ്കിലും ആര്ക്കും മത്സരം ജയിപ്പിക്കുന്ന തരത്തിലേക്ക് ഉയരാന് സാധിച്ചിട്ടില്ല.
സണ്റൈസേഴ്സാകട്ടെ ഒന്പതില് ഏഴും ജയിച്ച് പോയിന്റ് പട്ടികയില് ഒന്നാമതാണ്. ഏറ്റവും ശക്തമായ ബൗളിംഗ് നിരയുള്ള അവരുടെ ബാറ്റ്സ്മാന്മാരും മികവിലേക്ക് ഉയര്ന്നിട്ടുണ്ട്. ശിഖര് ധവാന് ഫോമിലേക്ക് മടങ്ങിവരുന്നതിന്റെ ലക്ഷണം കാണിച്ചത് ടീമിന് ശുഭവാര്ത്തയാണ്. കെയിന് വില്യംസന്റെ ബാറ്റിംഗും ക്യാപ്റ്റന്സിയും ഒരുപോലെ തിളങ്ങുന്നു.
