ഗസലുകളിലൂടെ മലയാളികളുടെ ഹൃദയത്തിൽ ഇടം പിടിച്ച ഗായകനായിരുന്നു ഉമ്പായി. പി എ ഇബ്രാഹിം എന്നായിരുന്നു യഥാർത്ഥ പേര്. കുട്ടിക്കാലത്ത് തന്നെ തബലവാദകനായി സംഗീത ലോകത്തെത്തിയ അദ്ദേഹം പിന്നീട് ഗസലിന്റെ വഴിയിലേക്ക് എത്തുകയായിരുന്നു.
https://www.youtube.com/watch?v=rPITWU1YIxE&feature=youtu.be
കൊച്ചിയുടെ ജനകീയ ഗായകൻ എച്ച് മെഹ്ബൂബിന്റ തബലിസ്റ്റായി പ്രവർത്തിച്ചു. തുടർന്ന് തബല പഠിക്കണമെന്ന ലക്ഷ്യത്തോടെ മുംബൈയിലേക്ക് പോയി. മുംബൈയിൽ ഉസ്താദ് മുജാവർ അലിയുടെ ശിക്ഷണത്തിൽ തബല അഭ്യസിച്ചു. ഉമ്പായിയുടെ ആലാപന മികവ് തിരിച്ചറിഞ്ഞത് മുജാവർ അലിയാണ്. ഗസലിന്റെ വഴിയിലേക്ക് ഉമ്പായിയെ നയിച്ചതും മുജാവർ അലിയാണ്. സ്വന്തം സൃഷിടികളിലൂടെയും പഴയ ചലച്ചിത്ര ഗാനങ്ങളുടെ ഗസൽ ആവിഷ്കാരത്തിലൂടെയും വലിയ ആരാധകവൃന്ദത്തെ നേടിയെടുത്ത ഗായകനായിരുന്നു ഉമ്പായി. പാടുക സൈഗാൾ പാടു, അകലെ മൗനം പോൽ, ഒരിക്കൽ നീ പറഞ്ഞു തുടങ്ങിയവ അദ്ദേഹത്തിന്റെ പ്രശസ്ത ഗസൽ ആൽബങ്ങളാണ്. 24 ഗസൽ ആൽബങ്ങളാണ് ഉമ്പായിയുടേതായി പുറത്തിറങ്ങിയത്.
എം ജയചന്ദ്രനോടൊത്ത് നോവൽ എന്ന സിനിമയിൽ സംഗീത സംവിധാനവും നിർവ്വഹിച്ചു. 5 പതിറ്റാണ്ടിലേറെ സംഗീത രംഗത്ത് നിറഞ്ഞ് നിന്ന ഉമ്പായി ഗസലിനെ ജനപ്രിയമാക്കുന്നതിൽ വലിയ പങ്കാണ് വഹിച്ചത്. ആലാപനത്തിൽ സ്വന്തം ശൈലി രൂപപ്പെടുത്തിയ ഉമ്പായിയുടെ വേർപാട് ഗസൽ സംഗീത മേഖലയ്ക്ക് തീരാനഷ്ടമാണ് ഉണ്ടാക്കുന്നത്.