നവരാത്രി പൂജയ്ക്കായി നാടും നഗരവും ഒരുങ്ങിക്കഴിഞ്ഞു. ഒമ്പത് ദിവസം നീണ്ടു നില്ക്കുന്ന ദുര്ഗാപൂജയുടെ ആഘോഷങ്ങള് ഒക്ടോബര് 19 ന് വിജയദശമിയോടുകൂടി സമാപിക്കും. ദുര്ഗാദേവി മഹിഷാസുരനെ വധിച്ചതിന്റെ പ്രതീകമായി ആഘോഷിക്കുന്ന ഉത്സവമാണ് ദുര്ഗാപൂജ. നവരാത്രിപൂജ എന്നാല് ഒമ്പതു രാത്രി നീണ്ടു നില്ക്കുന്ന പൂജ എന്നാണര്ത്ഥം. ഓരോ ദിവസവും പ്രത്യേകം പ്രത്യേകം പൂജ തന്നെ ആണ് അനുഷ്ഠിക്കുന്നത്. അവസാനത്തെ മൂന്നു ദിവസങ്ങളിലുള്ള പൂജയാണ് ഏറ്റവും പ്രധാനം.അവസാന മൂന്നു ദിവസങ്ങളെ ദുര്ഗ്ഗാഷ്ടമി, മഹാനവമി വിജയദശമി എന്നിങ്ങനെ ആണ് അറിയപ്പെടുന്നത്.
ദുര്ഗ്ഗഷ്ടമി ദിനത്തിലാണ് പൂജ വെയ്ക്കുന്നത്. ഈ ദിവസത്തില് പുസ്തകങ്ങളും ആയുധങ്ങളും പൂജ വെയ്ക്കുന്നു.
കര്മ്മ തടസ്സങ്ങള് മാറാനും വിദ്യാപുരോഗതിക്കും ദേവിയുടെ അനുഗ്രഹം ലഭിക്കുമെന്നാണ് വിശ്വാസം.
വിജയദശമി ദിവസം വ്രതം എടുക്കുന്നത് അത്യുത്തമമായി കരുതുന്നു. മത്സ്യമാംസാദികള് ഉപേക്ഷിച്ച് രാവിലെയും വൈകിട്ടും പ്രാര്ത്ഥിക്കുക.
വിജയദശമി ദിവസത്തിലാണ് വിദ്യാരംഭം നടത്തുന്നത്. കുട്ടികളെ എഴുത്തിനിരുത്തുന്നത് ഈ ദിവസത്തിലാണ്. തട്ടത്തില് വെച്ച അരിയില് ഹരി ശ്രീ ഗണ പതയേ നമ: എന്ന് എഴുതിക്കുന്നു. സ്വര്ണ്ണ മോതിരം കൊണ്ട് കുഞ്ഞുങ്ങളുടെ നാവില് ദേവീനാമം എഴുതുന്നതും ആചാരമാണ്. അങ്ങനെ കുട്ടി അക്ഷരത്തിന്റെയും ജ്ഞാനത്തിന്റെയും ലോകത്തിലേക്ക് പിച്ച വെയ്ക്കുന്നു. കേരളത്തില് കോട്ടയത്തെ പനച്ചിക്കാട് സരസ്വതി ക്ഷേത്രം വിദ്യാരംഭത്തിനു വളരെ പ്രശസ്തമാണ്.
