ന്യൂയോര്ക്ക്: ഫേസ്ബുക്കിന്റെ പുതിയ ഫീച്ചര് #10YEARCHALLENGE വിവാദത്തിലേയ്ക്ക്. പത്തുവര്ഷം മുന്പത്തെ ഫോട്ടോയും ഇപ്പോഴത്തെ ഫോട്ടോയും ഏകീകരിച്ച് പോസ്റ്റ് ചെയ്യുകയെന്നതാണ് ചലഞ്ചിന്റെ അടിസ്ഥാനം. ചലഞ്ച് അനുസരിച്ച് നിങ്ങളുടെ 2009 ലെ ഫോട്ടോയും 2019 ലെ ഫോട്ടോയും പോസ്റ്റ് ചെയ്യാനാകും.
കൂട്ടുകാരുടേയും കാമുകീകാമുകന്മാരുടേയും ഒക്കെ പത്ത് വര്ഷം മുന്നത്തെ ലുക്ക് കാണുകയെന്നത് എല്ലാവരും ഇഷ്ടപ്പെടുന്ന കാര്യം തന്നെയാണ്. അതുകൊണ്ടു തന്നെ സംഭവം ഹിറ്റ്. ചലഞ്ച് ആളുകള് ഏറ്റെടുത്തു. പലരും തങ്ങളുടെ പഴയ ലുക്കും പുതിയ ലുക്കും പോസ്റ്റ് ചെയ്ത് ട്രോളും തമാശയുമായി മുന്നോട്ടു പോകുമ്പോളാണ് ചലഞ്ചിന്റെ ഗൂഢലക്ഷ്യം പുറത്തു വരുന്നത്. പ്രമുഖ എഴുത്തുകാരിയായ കെറ്റ് ഒനീല് ആണ് ഇക്കാര്യം ആദ്യമായി പരാമര്ശിച്ചത്.
ചലഞ്ച് ഫേസ്ബുക്കിന് പുതിയ ഫേസ് റെക്കഗ്നേഷന് അല്ഗോരിതം രൂപം നല്കാനുള്ള അടവല്ലേ എന്നാണ് ഇവര് ട്വീറ്റ് ചെയ്തത്. ഉപഭോക്താക്കളുടെ വിവരങ്ങള് ശേഖരിക്കാനുള്ള ഗൂഢതന്ത്രം ഇതിന്റെ പിന്നിലുണ്ടെന്നാണ് കെറ്റ് അവകാശപ്പെടുന്നത്. ഇത് കണ്ടപ്പോഴാണ് പലരും ഉണര്ന്നത്. ഇതോടെ ഫോട്ടോ ഇട്ടവരെല്ലാം പോസ്്റ്റ് നീക്കാനുള്ള തത്രപ്പാടിലായി.
ഒരു കൃത്യമായ കാലയളവില് ഒരാള്ക്ക് എന്ത് മാറ്റം സംഭവിച്ചുവെന്നു മനസിലാക്കാനുള്ള തന്ത്രമാകുമെന്നും കെറ്റ് പറയുന്നു. ഒരു വ്യക്തിയെ കൃത്യമായി പഠിക്കാന് ഇത്തരം ഡാറ്റാ കളക്ഷന് ഉപകരിക്കുമെന്നാണ് വിലയിരുത്തല്.
