ക്രൈസ്റ്റ് ചര്ച്ച്: ന്യൂസിലാന്ഡിലെ രണ്ട് മുസ്ലീം പള്ളികളിലുണ്ടായ വെടിവയ്പ്പില് കൊല്ലപ്പെട്ടവരില് ഇന്ത്യാക്കാരുമുണ്ടെന്ന് സൂചന. 9 ഇന്ത്യാക്കാരെ ഇന്ന് രാവിലെ മുതല് കാണാതായിട്ടുണ്ടെന്ന് ന്യൂസിലന്ഡിലെ ഇന്ത്യന് സ്ഥാനപതി വ്യക്തമാക്കി. എന്നാല് ഇത് സംബന്ധിച്ച ഔദ്യോഗിക സ്ഥിരീകരണം ഇത് വരെ ലഭിച്ചിട്ടില്ല.
അതേസമയം, വെടിവയ്പ്പില് കൊല്ലപ്പെട്ടവരുടെ എണ്ണം 49 ആയി. 20 പേര്ക്ക് പേര്ക്ക് ആക്രമണത്തില് പരിക്കേറ്റിട്ടുണ്ട്. അപകടത്തില് പരിക്കേറ്റ പലരുടേയും നില ഗുരുതരമാണ്.
അക്രമി ഓസ്ട്രേലിയന് പൗരത്വമുള്ള തീവ്ര നിലപാടുള്ള ഭീകരനാണെന്ന് ഓസ്ട്രേലിയന് പ്രധാനമന്ത്രി സ്കോട്ട് മോറിസണ് സ്ഥിരീകരിച്ചു. മുസ്ലീം വിരുദ്ധരായ തീവ്രവാദികളാണ് ആക്രമണം നടത്തിയതെന്നാണ് വിവരങ്ങള്. ആക്രമണ സംഘത്തിലുണ്ടായിരുന്നതെന്ന് കരുതുന്ന മൂന്ന് പുരുഷന്മാരേയും ഒരു സ്ത്രീയേയും പൊലീസ് കസ്റ്റഡിയിലെടുത്തിട്ടുണ്ട്. സംഭവത്തില് കൂടുതല് വിവരങ്ങള് പൊലീസ് പുറത്ത് വിട്ടിട്ടില്ല.
മധ്യ ക്രൈസ്റ്റ് ചര്ച്ചിലെ അല്നൂര് പള്ളിയിലാണ് ആദ്യം വെടിവയ്പ്പ് ഉണ്ടായത്. പിന്നീടാണ് ലിന്ഡുവിലെ രണ്ടാമത്തെ പള്ളിയില് ആക്രമണം ഉണ്ടാകുന്നത്. സൈനികരുടെ വേഷത്തിലാണ് അക്രമി എത്തിയതെന്ന് ദൃക്സാക്ഷികള് വ്യക്തമാക്കിയിട്ടുണ്ട്. ഓട്ടോമാറ്റിക് റൈഫിളുമായെത്തിയ ഇയാള് പ്രാര്ത്ഥനക്കെത്തിയ ആളുകളുടെ നേര്ക്ക് വെടിയുതിര്ക്കുകയായിരുന്നു. കൊച്ചുകുട്ടികള് ഉള്പ്പെടെ ഉള്ളവര്ക്ക് പരിക്കേറ്റിട്ടുണ്ട്.
അതേസമയം വിവിധ കാറുകളിലായി സ്ഫോടക വസ്തുക്കള് സ്ഥാപിച്ചതും കണ്ടെത്തിയിട്ടുണ്ട്. അതീവ ജാഗ്രതയാണ് ന്യൂസിലന്ഡില് പ്രഖ്യാപിച്ചിരിക്കുന്നത്. പള്ളിയിലേക്ക് ഇപ്പോള് ആരും വരരുതെന്ന കര്ശന നിര്ദേശം അധികാരികള് ജനങ്ങള്ക്ക് നല്കിയിട്ടുണ്ട്. പ്രദേശത്തെ സ്കൂളുകള്ക്ക് അവധി പ്രഖ്യാപിച്ചിരിക്കുകയാണ്. പ്രധാന കെട്ടിടങ്ങള്, സര്ക്കാര് സ്ഥാപനങ്ങള് എന്നിവ പൂട്ടണമെന്നും പൊലീസ് നിര്ദ്ദേശമുണ്ട്. ഇത് ന്യൂസിലാന്ഡിന്റെ കറുത്ത ദിനങ്ങളിലൊന്നാണെന്നാണ് പ്രധാനമന്ത്രി ജസീന്ത ആര്ഡേണ് പറഞ്ഞത്