കൊച്ചി: മലയാളി താരം രാഹുൽ കെപി കേരള ബ്ലാസ്റ്റേഴ്സുമായി കരാറൊപ്പിട്ടു. സ്വന്തം നാടിന്റെ ടീമിന് വേണ്ടി കളിക്കാൻ അവസരം കിട്ടിയതിൽ അതിയായി സന്തോഷിക്കുന്നുവെന്ന് രാഹുൽ പറഞ്ഞു. ക്ളബ്ബിന്റെ ലക്ഷ്യത്തിനൊത്തു മുന്നേറാൻ തന്റെ എല്ലാ പരിശ്രമങ്ങളും നടത്തും. സ്വന്തം ആരാധകരുടെ മുന്നിൽ കളിക്കാനായി കാത്തിരിക്കുന്നുവെന്നും രാഹുൽ പ്രതികരിച്ചു.
വിങ്ങർ ആയും സ്ട്രൈക്കർ ആയും ഒന്നിലധികം പൊസിഷനുകളിൽ കളിക്കാൻ കഴിയുന്ന താരമാണ് രാഹുൽ എന്നും ഗോൾ നേടാനും അസിസ്റ്റു ചെയ്യാനും കഴിയുന്ന നിശ്ചയ ദാർഢ്യമുള്ള കളിക്കാരനായി രാഹുലിനെ ഉപയോഗിക്കുമെന്നും ബ്ലാസ്റ്റേഴ്സ് കോച്ച് എൽക്കോ ഷറ്റോറി പറഞ്ഞു.
തൃശൂർ സ്വദേശിയായ ഈ 21 കാരൻ വളരെ ചെറുപ്പത്തിൽ തന്നെ ഫുട്ബാൾ കരിയർ ആയി തിരഞ്ഞെടുത്തു. കൊൽകത്തയിൽ നടന്ന അണ്ടർ 14 അന്തർ സംസ്ഥാന ഫുട്‌ബോൾ ടൂർണമെന്റിൽ കേരളത്തെ പ്രതിനിധീകരിച്ച രാഹുൽ ഇന്ത്യയിൽ നടന്ന അണ്ടർ 17 ഫിഫ ലോകകപ്പിൽ ഇന്ത്യൻ കുപ്പായം അണിഞ്ഞു. ബ്ലാസ്റ്റേഴ്‌സിൽ എത്തും മുൻപ് ഇന്ത്യൻ ആരോസ് ടീമിൽ അംഗമായിരുന്നു രാഹുൽ.
