ന്യൂഡൽഹി : കാർഗിൽ യുദ്ധവിജയത്തിന് 20 വയസ്സ് പൂർത്തിയാകുമ്പോൾ ധീരബലിദാനികൾക്ക് പ്രണാമമർപ്പിച്ച് സൈനിക സംഘം യുദ്ധം നടന്ന പ്രദേശങ്ങൾ സന്ദർശിക്കും. ടോലോലിംഗ് , ബത്ര ടോപ് , ഖലുബാർ കുന്നുകളിലേക്കാണ് സൈനികർ ആരോഹണം നടത്തുന്നത്.
2 രജപുത്താന റൈഫിൾസിലെ സൈനികർ ടോലോലിംഗിലേക്ക് എത്തുമ്പോൾ 13 ജമ്മു കശ്മീർ റൈഫിൾസ് പോയിന്റ് 4875 ( ബത്ര ടോപ് ) സന്ദർശിക്കും. 1/9 ഗൂർഖ റൈഫിൾസാണ് യുദ്ധ വിജയത്തിന്റെ ഓർമ്മ പുതുക്കി ധീരസൈനികർക്ക് പ്രണാമമർപ്പിച്ച് ഖലുബാറിലേക്ക് കയറുക.
ഓർമ്മിക്കുക , ആഹ്ലാദിക്കുക , പുതുക്കുക എന്നതാണ് ഈ വട്ടത്തെ കാർഗിൽ യുദ്ധ വിജയാഘോഷത്തിന്റെ പ്രമേയം. രാജ്യത്തിനു വേണ്ടി വീരമൃത്യു വരിച്ച ധീരന്മാരെ ഓർമ്മിക്കുക, അവരുടെ പോരാട്ടത്തിന്റെ ഫലമായി നേടിയ യുദ്ധവിജയത്തിൽ ആഹ്ലാദിക്കുക, രാഷ്ട്രത്തോടുള്ള സ്നേഹവും അചഞ്ചലമായ കർത്തവ്യവും ഊട്ടിയുറപ്പിക്കുക എന്നതാണ് ഇതുകൊണ്ട് ഉദ്ദേശിക്കുന്നത്.
അതേസമയം കാർഗിൽ യുദ്ധ വിജയാഘോഷത്തിനായി ഒരുങ്ങുകയാണ് പ്രദേശത്തുള്ളവർ. കാണാതായ ആടുകളെ തേടിച്ചെന്ന ഇടയരാണ് 1999 മെയ് 3 ന് പാകിസ്ഥാൻ സൈന്യത്തിന്റെ കടന്നു കയറ്റം കണ്ടത്. അന്ന് യുദ്ധം കണ്ട പലരും ഇന്ന് ജീവിച്ചിരിപ്പുണ്ട്. ഇന്ത്യൻ സൈന്യത്തിന്റെ പോരാട്ട വീര്യത്തെ അഭിമാനത്തോടെയാണ് തങ്ങൾ ഓർമ്മിക്കുന്നതെന്ന് പ്രദേശവാസികൾ വ്യക്തമാക്കുന്നു.
ജൂലൈ 26 ആണ് കാർഗിൽ വിജയദിവസ് ആയി ആഘോഷിക്കുന്നത്.
