തിരുവനന്തപുരം: യൂണിവേഴ്സിറ്റി കോളേജില് വിദ്യാര്ത്ഥിയെ കുത്തിക്കൊല്ലാന് ശ്രമിച്ച കേസില് ശിവരഞ്ജിത്തും നസീമും കുറ്റം സമ്മതിച്ചു. പെട്ടന്നുണ്ടായ പ്രകോപനത്തിലാണ് കുത്തിയതെന്ന് ശിവരഞ്ജിത്ത് മൊഴി നല്കിയതായി പൊലീസ് അറിയിച്ചു.
ഇന്നലെയാണ് പ്രതികളെ പൊലീസ് പിടികൂടിയത്. തിരുവനന്തപുരം കേശവദാസപുരത്തെ ഒരു വീട്ടില് നിന്നാണ് ഇരുവരേയും പൊലീസ് പിടികൂടിയത്. കേസില് ഇന്നലെയും മൂന്ന് പേര് പിടിയിലായിരുന്നു. കോളേജിലെ എസ്എഫ്ഐ യൂണിറ്റ് ഭാരവാഹികളായ ആരോമല്, അദ്വൈത്, ആദില് എന്നിവരെയാണ് ഇന്നലെ പൊലീസ് കസ്റ്റഡിയിലെടുത്തത്.
ഇന്നലെ ശിവരഞ്ജിത്തിന്റെ വീട്ടില് പൊലീസ് റെയ്ഡ് നടത്തിയിരുന്നു. സര്വകലാശാല പരീക്ഷ എഴുതാനുള്ള പേപ്പറും കോളേജിലെ സീലും വീട്ടില് നിന്നും പോലീസ് കണ്ടെത്തിയിരുന്നു. ഫിസിക്കല് എജ്യുക്കേഷന് ഡിപ്പാര്ട്ട്മെന്റിന്റെ സീലാണ് ലഭിച്ചത്.
കേസിലെ ഒന്നാം പ്രതിയും എസ്എഫ്ഐ യൂണിറ്റ് നേതാവുമായ ശിവരഞ്ജിത്തിന്റെ വീട്ടില് നിന്നും ഉത്തരക്കടലാസുകള് കണ്ടെത്തിയ സംഭവത്തില് സര്വകലാശാല അന്വേഷണം പ്രഖ്യാപിച്ചു. കേസില് ഉള്പ്പെട്ട 7 വിദ്യാര്ത്ഥികളെ കോളേജില് നിന്നും സസ്പെന്ഡ് ചെയ്തു.
