ന്യൂഡൽഹി : അന്തരിച്ച മുൻവിദേശകാര്യമന്ത്രി സുഷമ സ്വരാജിന് അന്ത്യാഞ്ജലി അർപ്പിച്ച് പ്രധാനമന്ത്രി. ഡൽഹിയിലെ വസതിയിലെത്തിയ പ്രധാനമന്ത്രി അന്ത്യാഞ്ജലി അർപ്പിച്ചതിനു ശേഷം മകളേയും ഭർത്താവിനേയും ആശ്വസിപ്പിച്ചു. പ്രിയ സഹപ്രവർത്തകയുടെ വേർപാടിൽ പ്രധാനമന്ത്രി വികാരാധീനനായി.
മുൻ ആഭ്യന്തര മന്ത്രിയും മുതിർന്ന ബിജെപി നേതാവുമായ എൽ.കെ അദ്വാനിയും മകൾ പ്രതിഭ അദ്വാനിയും സുഷമ സ്വരാജിന് ആദരാഞ്ജലിയർപ്പിച്ചു. സുഷമയുടെ മകളെ കെട്ടിപ്പിടിച്ച് പ്രതിഭ അദ്വാനി പൊട്ടിക്കരഞ്ഞു. എൽ.കെ അദ്വാനിയും വികാരാധീനനായി.
കോൺഗ്രസ് നേതാക്കളായ രാഹുൽ ഗാന്ധിയും സോണിയ ഗാന്ധിയും വസതിയിലെത്തി അന്ത്യാഞ്ജലി അർപ്പിച്ചു. രാഷ്ട്രീയ സാമൂഹ്യ മേഖലകളിലെ നിരവധി പ്രമുഖരും പ്രവർത്തകരും അവരുടെ പ്രിയപ്പെട്ട നേതാവിന് അന്ത്യാഞ്ജലി അർപ്പിക്കാൻ വസതിയിലെത്തിയിരുന്നു.
വസതിയിൽ പൊതു ദർശനത്തിനു വച്ച ശേഷം ഭൗതികദേഹം ബിജെപി ആസ്ഥാനത്തേക്ക് കൊണ്ടു പോയി. പൂര്ണ ബഹുമതികളോടെ ലോധി ശ്മശാനത്തിലാണ് സംസ്കാരം.
