കൊല്ക്കത്ത: അന്താരാഷ്ട്ര ക്രിക്കറ്റില് നിന്നും വിരമിച്ച മുന് ന്യൂസിലന്ഡ് താരം ബ്രണ്ടന് മക്കല്ലം ഐപിഎല്ലിലേക്ക് മടങ്ങിയെത്തുന്നു. ഇത്തവണ കളിക്കാരനായല്ല താരം എത്തുന്നത്, മറിച്ച് തന്റെ ആദ്യ ഐപിഎല് ടീമായ കൊല്ക്കത്ത നൈറ്റ് റൈഡേഴ്സിന്റെ മുഖ്യ പരിശീലകനായാണ് മക്കല്ലത്തിന്റെ മടങ്ങി വരവ്.
ഐപിഎല്ലിനു പുറമേ കരീബിയന് പ്രീമിയര് ലീഗില്(സിപിഎല്) ട്രിന്ബാഗോ നൈറ്റ് റൈഡേഴ്സ് ടീമിന്റെ പരിശീലകനായും മക്കല്ലം ചുമതലയേറ്റിട്ടുണ്ട്. നൈറ്റ് റൈഡേഴ്സ് ടീമുകളുടെ പരിശീലകനാകാന് കഴിഞ്ഞതില് സന്തോഷമുണ്ടെന്നും രണ്ട് ടീമുകളിലും മികച്ച കളിക്കാരുണ്ടെന്നും പറഞ്ഞ അദ്ദേഹം ഇരു ടീമുകളുടേയും മികച്ച പ്രകടനമാണ് ലക്ഷ്യമിടുന്നതെന്നും വ്യക്തമാക്കി.
ഇക്കഴിഞ്ഞ ഓഗസ്റ്റ് 5നാണ് 37കാരനായ മക്കല്ലം അന്താരാഷ്ട്ര ക്രിക്കറ്റില് നിന്നും വിരമിക്കല് പ്രഖ്യാപിച്ചത്. നേരത്തെ ഐപിഎല്ലില് അദ്ദേഹം കൊല്ക്കത്ത ടീമിലംഗമായിരുന്നു. ആദ്യ എഡീഷനിലെ ആദ്യ മത്സരത്തില് റോയല് ചലഞ്ചേഴ്സ് ബാംഗ്ലൂരിനെതിരെ അദ്ദേഹം നേടിയ 158 റണ്സ് ഇന്നും ഐപിഎല്ലിലെ മികച്ച ഇന്നിംഗ്സുകളില് ഒന്നാണ്. 2012,2014 വര്ഷങ്ങളില് കൊല്ക്കത്തയായിരുന്നു ജേതാക്കള്.
