ശ്രീനഗര്: നിയന്ത്രണ രേഖയില് വീണ്ടും പാകിസ്ഥാന് വെടിനിര്ത്തല് കരാര് ലംഘിച്ചു. പൂഞ്ചിലെ കൃഷ്ണ ഖാട്ടി സെക്ടറിലാണ് പകല് 11 മണിയോടെ ആക്രമണം നടന്നത്. ആക്രമണത്തില് ഒരു ജവാന് വീരമൃത്യു . നാല് പേര്ക്ക് പരിക്കേറ്റു. പരിക്കേറ്റവരെ ആശുപത്രിയില് പ്രവേശിപ്പിച്ചതായി സൈനിക വൃത്തങ്ങള് അറിയിച്ചു.
പാകിസ്ഥാന് യാതൊരു പ്രകോപനവും ഇല്ലാതെ മോര്ട്ടാറുകളും, ചെറു തോക്കുകളും ഉപയോഗിച്ച് ആക്രമിക്കുകയായിരുന്നു. ഇന്ത്യന് സൈന്യം ശക്തമായി തിരിച്ചടിച്ചതായും സൈനിക വൃത്തങ്ങള് അറിയിച്ചു.
കഴിഞ്ഞ ഏതാനും ദിവസങ്ങളായി അതിര്ത്തിയില് പാക് പ്രകോപനം തുടരുകയാണ്. ഞായറാഴ്ച രജൗരി ജില്ലയിലെ നൗഷേര സെക്ടറിലും പാകിസ്ഥാന് വെടി നിര്ത്തല് കരാര് ലംഘിച്ചിരുന്നു.
അതേ സമയം പാകിസ്ഥാന് നടത്തുന്ന ചെറിയ ആക്രമണങ്ങള്ക്കുപോലും തക്കതായ മറുപടി നല്കുമെന്നും സൈനിക വൃത്തങ്ങള് അറിയിച്ചു.
