ആന്റിഗ്വ: വിന്ഡീസ് പര്യടനത്തിലെ ആദ്യ ടെസ്റ്റ് മത്സരത്തിന് ഇന്ത്യ ഇന്നിറങ്ങുമ്പോള് ടീമിന്റെ ജഴ്സിയിലേക്കാണ് ആരാധകര് ഉറ്റുനോക്കുന്നത്. ഐസിസി പരിഷ്കരിച്ച ടെസ്റ്റ് ജഴ്സിയില് ഇന്ത്യന് താരങ്ങളുടെ ആദ്യ മത്സരമാണിത്.
മത്സരത്തിന് മുന്നേ തന്നെ ജഴ്സി ധരിച്ചുള്ള ഇന്ത്യന് താരങ്ങളുടെ ചിത്രം സമൂഹ മാദ്ധ്യമങ്ങളില് തരംഗമായിക്കഴിഞ്ഞിരിക്കുകയാണ്. ഇന്സ്റ്റഗ്രാമിലൂടെ താരങ്ങള് തന്നെയാണ് ചിത്രങ്ങള് പുറത്തു വിട്ടിരിക്കുന്നത്. വിരാട് കോഹ്ലി, അജിങ്ക്യ രഹാനെ, റിഷഭ് പന്ത്, ചേതേശ്വര് പൂജാര, കുല്ദീപ് യാദവ് എന്നിവരാണ് ചിത്രങ്ങള് പങ്കുവെച്ച് രംഗത്തെത്തിയത്.
ഏകദിന ക്രിക്കറ്റിലേതിന് സമാനമായി ടെസ്റ്റിലും ഇന്ത്യന് താരങ്ങളുടെ ജഴ്സി നമ്പറില് മാറ്റമില്ല. വിരാട് കോഹ്ലി 18, രോഹിത് ശര്മ്മ 45, രവീന്ദ്ര ജഡേജ 8, റിഷഭ് പന്ത് 17, കുല്ദീപ് യാദവ് 23, ഇഷാന്ത് ശര്മ്മ 97, ചേതേശ്വര് പൂജാര 25 എന്നിങ്ങനെയാണ് ഇന്ത്യന് താരങ്ങളുടെ ടെസ്റ്റ് ജഴ്സി നമ്പറുകള്.
ഓഗസ്റ്റ് 1ന് ബെര്മിംഗ്ഹാമില് ആരംഭിച്ച ആഷസ് പരമ്പരയോടെയാണ് ടെസ്റ്റ് ക്രിക്കറ്റ് ചാംപ്യന്ഷിപ്പിന് തുടക്കമായത്. ആഷസ് പരമ്പരയിലെ ആദ്യ മത്സരത്തിലാണ് ടെസ്റ്റ് ക്രിക്കറ്റിന്റെ ചരിത്രത്തിലാദ്യമായി കളിക്കാര് പേരും നമ്പറുമുള്ള ജഴ്സി ഉപയോഗിച്ചത്.